Zaithiam hriathlawh, Rebecca Fanai chuan, ‘Min Zirtir ang che’ tih hla thar mawi tak hmangin mipui te min awi leh dawn ta.
He hla hi hla phuah thiam Chhantea Ralte phuah a ni a, he hla hian harsatna leh buaina karah pawh Kan chunga Pathian rorel dana lungawi zir tur in min tanpui dawn a ni. Rebecca Fanai hian ‘Myanmar Lungphang suh aw’ tih hla Chhantea Ralte phuah tho hi lungkuai tak maiin a lo sa tawh bawk a, hei hi Zoram in Rebecca Fanai kan hmelhriat tanna pawh a ni a, Burma lama kan unau harsatna tawk mekte tan phei chuan a hlu tak zet a ni.
Zaithiam Rebecca Fanai hi tunah hian USA ah Nurse hna thawkin a awm a, kum liamta 2022 khan zaithiamte tana chawimawina hlu tak tak Chin New Artist of the year-ChinTV leh New Artist of the year- ChinTube People’s Choice Awards a dawng nghe nghe a ni.
‘Min zirtir ang che’ tih hla thar hi February ni 12, Sunday zing dar 7:30 am ah Rebecca Fanai Youtube channel ah en leh ngaihthlak theih a tlangzarh a ni ang a, Zonet lamah chuan February ni 13, Thawhtanni ah tih chhuah a ni ve thung ang.