A pa lar vang maia lar ngawt a ni bik lova, mi ngaihven hlawhna ringawt kha ‘star’ a insiam theihna a ni hek lo. Abhishek Bachchan-a’n kawng hautak a zawh a, a kawng sialah huai takin a kal ngam a, remchangah a pa hmang lo.
Mahse, a tir lamah khan lemchan khawvela a zuang lut ve ngawt chu a inchhir hman viau a, a kuang lo nawr ah inngaiin, tifuh lo tawp ah a inruat hman.
A kalna tur ni lovin a inhria a, acting chawlhsan a tum lai takin a pa Amitabh Bachchan-a fuihna leh thurawn pek chuan a vaw harh chiang hle.
Lemchan khawvel a luh hnu hun eng-emaw chen thleng khan a film chan te chu a flop chho zut zut a, a hlawhchham. “He industry-a ka lut ve ngawt hi ka tisual chhia va a, ka beih nasat poh leh ka hlawhchham ting mai a ni tih inhriatna kha vawikhat chu chiang kuang takin ka nei hman a, Ka pa bulah, ‘He film industry tana siam ka ni ve lo’ ka ti chhuak hial,” a ti.
A pa thurawn leh tawngkam chhuak erawh a dang daih thung. ‘Hlawh-chham turin ka siam lo che’ a ti. Mi tu pawhin zing an thawh apiangin Ni hnuaia eng thil lakah pawh hmun pakhat an chan ve theih nan an ‘fight’ vek. Chuvang chuan a kawnga lo awm remchanna reng reng chu la a, a tha thei ang bera chhuah zel turin’ a fuih ta a, chu chuan a nun a her danglam.
Hemi hnu hian film hit leh lar tak tak a vawrh chhuak chho ta mawlh mawlh mai a, nikum hripui len lai pawh khan OTT platform kaltlangin film hmuhnawm leh enhlawh ti chhuak chhunzawmin, Bollywood-a filmstar tha ber te zinga chhiar tel a ni ta reng mai.