Aizawl: Rulhut do beihpui bultan ni, National Deworming Day chu nimin khan PC Girls School, Aizawlah Women & Child Development Minister Er. Lalrinawma’n a hawng a, hemi rual hian district dang zawng zawngah pawh hman a ni.
Rulhut do beihpui hian naupang zawng zawng, sikul kal leh kal lote pawh a huam vek a, beihpui hawn ni hian a damdawi, Albendazole chu sikulah leh anganwadi centre-ah te naupang eitir niin beipui thlak chhung hian sikulah leh anganwadi centre-ah te ni ruat bikah a thlawna ei theih a ni dawn bawk.
Sorkar thuchhuahin a tar lan danin khawvel pumah naupang maktaduai 836-te chu rulhut pai thei dinhmunah an ding a, India ramah naupang maktaduai 241-te chu rulhut pai thei dinhmunah an ding nia chhut a ni a. Naupangten rulhut an pai lohna turin kum 2015 atang India ramah National Deworming Day hman tan niin Mizoramah chuan kum 2016-ah hman tan a ni a. Mizorama naupang kum 1-19 inkarte hmaih awm lova rulhut damdawi mum eitir theuh tum a ni.
Rulhut do beihpui hawngtu, Er. Lalrinawma chuan National Deworming Day chu rulhut umbo a nih theihna tura ruahman a nih thu sawiin nu leh pate pawh an tu leh fate zawng zawng rulhut hlo eitir theuh turin a chah a. Naupang an hrisel theihna turin rulhut laka an fihlim a pawimawh thu sawiin, “Ei hrisel ringawt a tawk lo va, an thil tha eiten awmze neia hna a thawh theih nan naupangte chu rulhut laka ven an ngai a ni,” a ti bawk.