Aizawl: ZPM PAC member TBC Lalvenchhunga’n, “Department danga ram hmasawnna tur sum awm lo khawpin sports department vulh mek a ni,” tiin, “Heti ringawt chuan Rome lalram rorelna tluchhia ang kha kan hmabak a ni awm e,” a ti.
Nimina ZPM party political session-ah he thu hi TBC Lalvenchhunga chuan a sawi a. Mizoram State Sports Council (MSSC) hnuaiah Rs. vbc 554.04 hmanga hnathawh mek nia sawiin, UD&PA atangin Rs. vbc 31 leh Aizawl Smart City Ltd. hnuaiah sports atan Rs. vbc 98 hman a nih thu a sawi a. Sports infrastructure atana hman chu a vaia belhkhawm Rs. vbc 683 a nih thu sawiin, “Heti zat hi PWD, electric leh PHE department te belhkhawmin hnathawhna tur an nei lo,” a ti.
SASCE atangin Rs. vbc 37 hman mak a nih thu pawh TBC Lalvenchhunga chuan sawiin, REC atangin CSR sum motor race track siam nan Rs. vbc 7.5 ruahman a nih thu leh state sorkarin Rs. vbc 8 a tum ve tur thu a sawi a. Kum 2019 atanga tun thlenga agri & allied sector-a sum dah let thum vel leh power atana sum dah let hnih chuang sports atan hman a ni tihna a nih thu a sawi.
TBC Lalvenchhunga chuan, “Kan sorkar kal dan hi crony capitalism an tih fo, mi tlem tê induhsakna ang chiah hi a ni,” tiin, “India ram pawh Modi leh Adani te induhsakna avangin kan buai mek a, chutiang chiah chu tun dinhmunah Mizoram hian kan tawk mek niin a lang,” a ti.
Roman circus an tih, Rome hunlaia emperor ten khua leh tuite rilru pawhpenna atana hlimhlawp leh intihhlimna siama mipui leh retheite an bum angin tuna Mizoram sorkar pawhin hlimhlawp leh infiamna hmanruaa hmangin retheite leh mipuite a bawl ni bera a lan thu TBC Lalvenchhunga chuan a sawi bawk.