NBA team ten tun season atana an team insiksawi theihna hun chu Zirtawpni zing dar 1:30 khan khar a ni a. Team hrang hrangten an roster an siamrem dan a ngaihnawm hle.
Player che vel zingah tunkarah ‘trade’ lian a awm nual a. Kyrie Irving chuan Brooklyn Nets chhuahsanin Dallas Mavericks a pan tawh a, Lakers in an team a fuh hleithei lo, contract lian nei ni si Russell Westbrook an lo chhuahtir tawh.
A lian ber erawh Ningani khan a che dawn tih a chiang tawh a. A insawnna tihfel niin Brooklyn Nets in an star player Kevin Durant chu Phoenix Suns hnenah an kal tir.
Phoenix-ah KD, Suns buk a rit
Brooklyn-ah tum sang tak neiin a kal, mahse kum thum chhungin a fuh hleithei lo. Team-ah neuh neuh a tam a, beisei an pha thin lo. Thla riat chhunga a vawi hnih nan trade request a thehluh hnuah Durant-a’n a duh a hmu a. Phoenix Suns hnenah a kal.
Suns hian kum 34 mi, tun dinhmun a league a offensive player tha ber a mi tam tak ngaih lalut turin Nets hnenah hian an pe hnem a. Forward Mikal Bridges, Cam Johnson, Jae Crowder leh first round pick (unprotected) pali an pe.
Phoenix Suns hi tunhnai kum thum chhunga West a team tha a insiam an ni a, NBA Playoffs-ah a khauh ber niin kum 2021 khan NBA Finals-ah Milwaukee Bucks lakah an tlawm.
Hei vang hian Durant an neih thar avangin tun season-ah champion thei tur zingah an buk a rit zual. Star player dang Devin Booker an nei a, palian Deandre Ayton nei bawkin veteran Chris Paul a la awm a. Anni pathum leh Durant te an khelho tur hian mi tam takin Western Conference-ah Dallas Mavericks nen team hlauhawm ber an ni dawn niin an ngai.
Hetihlai hian Brooklyn lamin an star player pahnih an chhuahtir a, hmalam hun thlirin team thar induan an tum tih chiang takin a lang.
Kyrie Irving an chhuahtir naah draft pick leh contract nei lian tawh lo player an dawng a, Durant trade-ah first round pick leh player rintlak an dawng tel bawk.
An dawn tel zing ami Jae Crowder chu Milwaukee Bucks hnenah an kal tir bawk a. Second round pick pahnih leh player naupang guard Juan Pablo Vaulet an dawng a. Duhtawk a season tawp a insiksawi turin salary cap-ah awl an neih dawn bakah an team pawh a thawl dawn.
Warriors in Wiseman chhuahtir
Golden State Warriors chuan an center beiseiawm James Wiseman chu team pali inremna trade-ah an chhuahtir a. An sum senso tur tih tlemna a nih bakah nikuma an player tangkai Gary Payton II an la let.
Kum 21 mi Wiseman hi player hmabak eng tak nei a ngaih a ni chungin a inhliam leh thin a. Warriors rotation-ah hmun pawimawh a chang hleithei lo.
Hei vang hian a hlutna a la san laiin Warriors in an chhuahtir a. Hetia an insiksawi avang hian Warriors in kuminah salary cap-ah luxury tax-ah Dollar maktaduai 7 vel an chawi loh phah dawn a, 2023-2024 season Dollar maktaduai 30 vel chu chawi lo leh dawn bawkin hei hi an team a player pawimawhte contract pekna atan a tangkai ang.
Lakers an che fuh
Kum 2020 NBA champion Los Angeles Lakers hi star player LeBron James leh Anthony Davis te nei mahse an squad awmdan chu a tha tawk lo tia sawisel an ni thin a. Tun dinhmunah an tan playoff khelh pawh a beiseiawm lo telh telh.
Nimahsela tunkarah an che fuh niin a lang a. Westbrook an chhuahtirnaah an team mamawh shooting tha Malik Beasley leh D’Angelo Russell te an neih bakah Jarred Vanderbilt an nei tel.
Hetah hian an la duhtawk lo. An guard Patrick Beverley chu Orlando Magic hnenah an kaltir a, 2024 second-round pick an neih tur pe tel bawkin center Mo Bamba an lalut.
Kum 23 mi Bamba hi rookie contract neilai a nih avangin a hlawh a la tam lova, a contract a la rei bawk avangin Lakers squad atana player tangkai ni tura ngaih a ni.
Feet 7 a sang a ni chungin offense-ah a tangkai bakah ball a shoot tel thei a, 2021-22 season-ah fak a hlawh hle hnuah kuminah khelhna hmun a chang tam lova, hei vang hian Magic in chhuahtir mai an phal.