AS Monaco in hliamin a tihbuai Paris Saint-Germain lakah hnehna an chang a. An captain Wissam Ben Yedder chuan hneh taka hma hruaiin first half-ah an che tha hle.
Inrinni zana Stade Louis II a Ligue 1 inkhelah PSG in inhliam avangin Kylian Mbappe, Lionel Messi leh Marco Veratti te an chhawr thei lo vek a. Nimahsela an tlarhma lam aiin an tlarhnung zawk inkhelah an langsar.
Monaco tlarhmaah Ben Yedder a che tha hle a, PSG tlarhnung chhaihbuaitu ber a ni a. Minute 4-naah defender pathum lakah tlangin Aleksandr Golovin goal khung tur a siamsak.
Minute 14-naah Krepin Diatta thawhrah atangin Ben Yedder-a’n an goal hnihna a khung a. PSG kum 17 mi defender El Chadaille Bitshiabu a chesual.
PSG in Carlos Soler leh Juan Bernat te inkawp hmanga tlarhnung thiatin kum 16 mi Warren Zaire-Emery chuan goal khat a khung ve a. Nimahsela halftime hma in Ben Yedder bawkin an goal thumna a khung a. League-ah a goal 14-na a khung tawh.
Monaco player Youssouf Fofana chuan, “Zanina pawimawh chu kan rilru puthmang kha a ni a, hun pawimawhah kan inthunun theihna kan lantir a, hetiang chakpui tur hian kan rilru puthmang dik hi kan hmang thiam hle.” a ti.