Arsenal tan mi thar Leandro Trossard chuan a goal hmasa ber khung mahse hnehna chan nan a tawk lova. Premier League hmahruaituten point riat a san theihna hun an neih chu chhawr lovin Brentford nen 1-1 in an inhnehtawk.
Inrinni zana Emirates Stadium a inkhelah tunhnaia che tha ve tho Brentford leh Arsenal inkhel a hmuhnawm a. First half-ah goal lut lo mahse Bees in Ivan Toney hmangin goal ban an tih per.
Second half minute 66-naah substitute bench atanga dah luh a nih hnu lawkah Trossard-a’n Gunners goal a khung a. Hma erawh an hruai rei lo.
Brentford in an phu ang ngeiin goal an khung a, Toney-a’n Christian Norgaard ball cross chu penalty area chhungah nangin goal-ah a khung. He goal hi VAR hmangin hun engemaw chen endik a nih hnuah goal-ah pawm a ni a. Goal a luh belh zui tawh lo.
Mahni mualah tun season a la tlawm miah lo Arsenal in Bees lakah fiahna khauh an hmachhawn a. Brentford laka an point hloh a pawi thei ang. A tawpah na takin goal nawr mahse Brentford ding khawng tlat tawh chu an su tlang zo lo.
Inkhel zawh lam
Arsenal boss Mikel Arteta chuan inkhel zawhah an goal chhuah a sawisel na hle. “Point thum hmuh kan duh avangin kan result a lawmawm lo. Goal kan khung a, mahse inkhel kan thunun loh avangin a lawmawm lo.”
“Kan goal ven danah khan offside dan an sawi chiang takin kan zawm vek a, keini lamin kan zawm a, anni lamin an zawm ve lo a ni ang.” tiin Brentford goal pawm a sawisel.
Inkhel dang
London club dang pahnih inkhelah Chelsea leh West Ham United 1-1 in an inhnehtawk. Blues tan Joao Felix chuan goal khungin Chelsea player hlui Emerson Palmieri chuan Hammers goal a khung.
Leicester City in Nampalys Mendy, James Maddison, Kelechi Iheanacho leh Harvey Barnes te goal hmangin 4-1 in Tottenham an hneh.