Vawiin hian finance changtu, Chief Minister Zoramthanga chuan 2023-2024 chhunga Mizoram sum ruahman chu assembly-ah a pharh ang.
Zoramthanga chuan 2022-2023 a sum ruahman belh (Supplementary Demands for Grants) chu budget pharh pah hian a pharh nghal dawn bawk.
Mizoram assembly inkhawma an kalphung pangngai angin budget pharh ni hian thil dang engmah assembly inkhawmah kalpui a ni lo vang. Chief minister hian budget a pharh zawh hnuah chanchinbumite a kawm nghal dawn a, sum ruahman chungchanga sawi zau ngai leh mipui hriat atana pawimawhte a sawi dawn a ni.
Business Advisory Committee (BAC)-in a lo ruahman lawk ang chuan Thawhlehni hian supplementary demands hi sawihoin pawm nghal beisei a ni a. Budget sawiho hun atan hian February 16 leh 21 ruahman a ni a. Minister-te department chan ţheuha sum ruahman sawihova pawm tur hi February 22 atanga tanin 28-a zawh tura ruahman a ni.