Shiv Sena chuan Mumbai khawpuia hmeichhe pawngsual leh thahna thleng chuan mi tin a barakhaih thu an sawi a; mahse, Mumbai chu hmeichhiate tana khawvela khawpui him ber a nih thu an sawi a, tumahin a himna ringhlel lo turin an ti.
NCP leh Congress nena Maharashtra-a rorel mektu hian an party chanchinbu, ‘Saamana’ editorial-ah Thawhtanni khan tun hnaia thil thleng chu Maharashtra tan hmungchhiatna a nih thu leh mipui an thinrim pawh a awm tih an ziak.
Hmeichhia kum 34 mi hi Zirtawpni khan Mumbai dai, Sakinaka-ah pawngsual niin nasa taka sawisak a ni a, a serhah rod hawlh luh hial a ni a. Damdawi ina lak a nih hnuah Inrinni khan a thi.
He thil thleng hi kum 2012-a Delhi-a thleng, ‘Nirbhaya gang-rape case’ nen pawh a inang hle.
Thil thlen atanga reilo te hnuah mipa kum 45 chu man niin tualthah thubuai siamsak a ni.
Marathi tawnga chanchinbu tihchhuahah hian, “Sakinaka-a hmeichhe pawngsual leh thah thleng hian mi tin a barakhaih a; mahse, Mumbai hi hmeichhiate tana khawvela khawpui him ber a ni,” an ti.
Sakinaka-a hmeichhe pawngsual leh thahna thleng ang chu mi sual uchuak chetna niin khawvel hmun hrang hrangah a thleng reng niin an sawi a. Hathras case (nikuma Uttar-a Dalit tleirawl kum 19 mi pawngsual leh thah) nen chuan a inang lo niin an tar lang.
Editorial-ah hian Hathras case-ah chuan a titua ngaihte kha rorel lai thlawptu an nih avangin man hun pawh a tlai niin an tar lang a. Hmeichhe ruang pawh sorkarin finfiahna tihchhiat a duh avangin rang takin a haltir niin an tar lang bawk.
“Yogi (Adityanath)-a sorkar chuan Hathras-ah pawngsualna a thleng lo niin an sawi a, a dik lo chiang hle,” tiin ni tin chanchinbuah hian an tar lang a. Sakinaka-a National Commission for Women team team an thleng nghal ang kha Hathras case-ah chuan a awm lo niin an sawi bawk.
Kathua rape case (Jammu & Kashmir-a kum 2018-a hmeichhe kumtlinglo pawngsual)-ah pawh political party pakhat chuan a titua puh man a nih loh theih nan hma an la niin a tar lang a. Sakinaka-ah erawh a titua puh hi minute 10 chhung lekin police-in an man niin an sawi.