Finance changtu, Chief Minister Zoramthanga’n nimin khan budget a pharh zawhah chanchinbumite a kawmin Mizoram sorkar hnathawkten Dearness Allowance (DA) pung an ngiat mek chu tuna Mizoram sum dinhmunin a zir loh avangin tihhlawhtlin ngaihna a awm ngang loh thu a sawi.
Conference Hall, Assembly Annexe building-ah an inkawmnaah Mizoram sorkar hnathawkten DA an phut mek chungchang thu thar thehdarhtute zawhna chhangin finance minister hian, “Tuna sorkar sum dinhmunah pe lui ta ila, kan finance chuan a tuar khawp ang. Chuvangin, tunah mai chuan pe thei dinhmunah kan ding ngang lo, kan sum dinhmun en chuan,” a ti.
Sorkar hnathawkte hlawh pek tlai thin an nih chungchang pawh zawhna chhangin, sorkar laipui atanga sum hmuh tur dawn tlai thin vang a ni tih a sawi a. Hlawh hi lo pe tlai deuh pawh nise a zat hi a danglam chuang lo nia sawiin, “Hlawh hi pek thei loh ang tluk a ni a, a thla thar ni khat emaw, thla tawp ni 31-ah emaw kher kher erawh chuan kan pek theih lohna chhan chu kan pawisa lo lutna ber mai, khu lam atanga lo kala kha a tlai ta si a, khami kha kan innghat a, thla chanve-ah te kan innghat a ni,” tia sawiin, sorkar dinhmun azirin a hma thei ang ber leh a hun taka pek thin chu sorkar duhdan leh a hmalak mekna a ni thu a sawi.
Sorkar hnathawkte hlawh pek tlai thin avanga bank loan laten harsatna an tawk thin nia sawi thin chungchangah chief minister chuan, “Bank lama kan puk hi, thla tharah min rawn thing ziah a, bank lamah lo nghak turin kan hrilh a. A ni 15 hnu lama an hmu leh dawn a nih chuan a inkara kha thla khat dawn a ni a, a bul tanna a inang lo mai kha a ni a. Chuvangin, ‘min lo hrethiam rawh u,’ kan ti a. Anni pawhin ‘hlawh lak hunah an pek tho chuan a pawi chuang lo e,’ tiin an sawi,” a ti.
SEDP chungchang zawhna chhangin, tunah hian first instalment Rs 25,000 chu chhungkaw 60,000 te hnenah pek tawh a nih thu leh, tun sorkar kum kal mek chhungin 2nd instalment Rs 25,000 pek leh a ni dawn a. Sorkar kum thar lo awm turah pawh a dawng tur thlan an nih leh tur thu a sawi bawk.