Aizawl: Lawngtlai District Deputy Commissioner thar, David Lalthantluanga, IAS chuan nimin khan Amol Srivastava, IAS hnen atanga charge a la.
David Lalthantluanga hi Aizawl Tuikhuahtlang chhuak a ni a. Hindu College, Delhi University atangin Pol. Science-ah BA (Honours) a zo va. Institute of Management Technology, Ghaziabad atangin Post Graduate Diploma in Management (PGDM) a nei bawk.
Kum 1998 khan MCS zawmin kum 25 a thawh hnuah nikum December 19 khan Indian Administrative Service-ah pakaiin, AGMUT:2014 pek a ni a. Mizoram sorkara Local Administration Department (LAD) Secretary hna a chelh lai atangin Lawngtlai DC-ah hian sawn a ni.
Bawrhsap thar chuan district mipuite chibai bukin district hmasawn nan theihtawp chhuah a tum thu a sawi a. District mipui, tlawmngai pawl, kohhran, district council leh sorkar department-te tawiawmna leh thawhpuina ngenin a tulna apiangah fin chhuah thin turin a chah.