Larsap Hari Babu Kambhampati-a’n Mizoram chu ziak leh chhiar tamna ber state pakhat ni mah se, bank service lama hawiharh kawngah erawh a hnufual pawl a ni mek niin a sawi.
He thu hi nimina RBI buatsaih sum enkawl leh hman dan inzirtirna hapta, ‘Financial Literacy Week’ hawnna inkhawmah Larsap chuan a sawi a. “Bank service lama kan hnufualna hi tan kan lakna tur lai a ni,” tiin, sum hman dan tha zawk hriat chu khua leh tuite chanvo a nih thu leh sum khawhral avanga hun reilo tea retheihna a thlen theih avanga sum enkawl dan dik hriat chu mi tin mamawh a nih thu a sawi.
Larsap chuan insurance scheme tha tak tak leh sum peipun dan tha zawkte tam tak awm mah se, mipui mimirin an hriat lar chu saving account a nih thu leh hemi kawngah hian banker leh sorkar official te tan lak a tul thu a sawi a. “Literacy rate-a san theih chuan kan financial literacy rate pawh a sang ve tur a ni,” a ti.
Financial literacy Week thupui atan ‘Good financial behaviour – your saviour’ tih niin he thupui hnuaiah hian sum khawl, uluk taka pawisa hmanna tur duan lawk, pawisa lut leh chhuak tur hisap lawk tangkaina bakah digital banking service hrang hrangte tangkai zawka hman leh fimkhur dan inzirtirna te neih tum a ni.
Larsap chuan booklet, ‘Be (A) ware’ tih chu a tlangzarh nghal a, he lehkhabuah hian sum chungchanga inbumna hrang hrang atanga himna tur inkawhmuhna lamte ziak a nih thu sorkar thuchhuah chuan a tar lang a ni.