Aizawl : Khawzawl district-a Fair price shop (retailer dawr) sakna tur chungchanga hmalak dan tur sawihovin nimin khan Khawzawl Bawrhsap CC Lalchhuangkima hovin Khawzawl district-a VCP te an thukhawm.
Bawrhsap chuan Khawzawl district-ah Fair price shop fai leh mipuite tana awlsam taka service pek theihna tha chu khawvel changkang zela mamawh a nih thu a sawi a. Sorkar laipui hmalaknain Fair price shop te tih changkan leh hmasawn tuma ruahmanna siam a nih thu a sawi.
Khawzawl Bawrhsap chuan “Mizorama fair price shop-te chu hmun nghet nei lovin an awm a, retailer neitute an inthlak apiangin an awmna an sawn a ngai fo thin a, hei hian fair price shop dawrtu mipuite tan kawng tam takah harsatna a siam a, buhfai thianghlimna pawhin a tawrh phah fo a ni” a ti bawk.
Fair price shop hmun nghet nei tura hun rei tak ngaihtuahna an lo sen tawh thu kalkhawm te chuan an sawi a. Union Minister of State, Ministry of Consumer Affairs, Food & Public Distribution changtu Ashwini Kumar Choubey-a’n nikum November-a Mizoram a tlawh tumin Central warehousing corporation (CWC) atanga Fair price shop sakna tura tanpui an inhuam thu leh chumi atan chuan ram ruak (vantlang ram, lei ngai lo tur) mamawh a nih thu te sawilan a ni.
Bawrhsap hova thukhawm hian ram ruak nei thei khuate chu Bawrhsap office-ah inhriattir thuai se, an ti a. Kalkhawm zingah an khuaa Fair price shop sakna tur ram ruak nei thei tur leh a zau zawng leh tul dangte an sawi a. Hun tiam ral hma ngeia VC zawng zawngin an ram neih zau zawng mumal taka tehchhuakin a thlalakte nen Bawrhsap office-ah thehlut se, an ti bawk.