Manchester City in Aston Villa chu first half-ah hneh takin an nghaisa a. Premier League hmahruaitu Arsenal umin ke an pen zel.
Pathianni zanah Premier League champion lai in an sum dinhmun chungchangah Premier League dan bawhchhiatna za chuang an nei nia puh an nih hnuah a vawikhatna atan inkhel an hmachhawn a. Khelmual pawn lam boruak tha lo mahse a chhung lamah erawh harsatna an nei lo.
Nung taka bul tanin football hlauhawm an khel a, mahse a tawp an khar dan erawh a awlsam lova, theihtawp chhuaha an tan a ngai.
Pep Guardiola pawlte hian Nilaini zanah Arsenal an hneh chuan Premier League hma an hruai thei dawn.
Chak mamawh City
Arsenal umtu an ni a, North London club in point an hlohin City in lo hloh ve zel an ching. Tun tumah an tan chak a pawimawh.
Tottenham Hotspur laka an tlawm hnuah City player-ten chetsual nawn an duh lova. Duhthusam a bul tanin Rodri chuan minute 4-naah Riyad Mahrez corner pet a tauh lut.
Halftime hma in goal hnih khung Calum Chambers tihsual atangin goal ruakah Ilkay Gundogan chuan an goal hnihna a khung a. Jacob Ramsey penalty chawi atangin Mahrez-a’n an goal thumna a khung.
City in inkhel dahtha in an inngai a, nimahsela second half-ah Ollie Watkins chuan Villa tan goal a khung a. Hei hian beiseina siamin City in tihsual an nei leh thin bawk nen, a tawp thlengin Villa an beidawng lo.
Philippe Coutinho chuan goal khung teuhin Jhon Duran chuan goal bar a tih per bawk.
City tana chanchin lawmawm lo awm chu striker Erling Haaland halftime-ah lakchhuah a ngai a. Inkhel zawhah coach Guardiola chuan fimkhur thu hla a la chhuak an nih thu a sawi.
United pakhat chauh
Ni nga chhunga a vawi hnih nan Manchester United leh Leeds United an inkhel a. Club inhmelma pahnihte hi Elland Road-ah intawngin huntawp dawn lamah United in goal hnih an khung a, 2-0 in hnehna an chang.
Old Trafford-ah 2-2 in an inhnehtawk tawh a, neutral fans tana inkhel hmuhnawm tak an lantir.
Tun tumah Leeds United mualah pawh an inkhel tawk leh viau a, chutihrualin team pahnihten football tha leh hmuhnawm khelh an harsat a. An indangchat dun fo.
United in first half-ah Bruno Fernandes hmangin goal khung theihna an nei a. Lehlamah manager nghet nei lo Leeds United pawhin United hi an chhaihbuai ve fo.
Red Devils tan danglamna siamtu chu striker che tha tak Marcus Rashford bawk a ni a. Tun season-ah a goal 21-na ni turin Luke Shaw ball cross chu minute 80-naah a tauh lut a. World Cup zawh hnuah European football-ah ani tluka che tha an awm lo.
Substitute Alejandro Garnacho chuan minute 85-naah Leeds tlarhnung lakah a tlanchakzia lantirin United goal hnihna a khung zui leh a. A sen lam hian Wout Weghorst leh Rashford te hmangin khung belh leh hman mahse offside avanga pawm loh an ni bawk.
Manchester United boss Eric ten Hag chuan, “Inkhel hautak a ni a, hei hi kan rinlawk sa a ni. A tirah kan chiai nasa a, thutlukna siam fuh loh kan neih hnem bakah ball kan kawl nghet lo. Inkhel kha a ri phut phut a, substitution kan siam hnu khan kan zia a, kan thunun thei zawk a ni.” tiin a sawi.