- HC Vanlalruata
Gauhati High Court chuan tunhnai khan Mizoram sorkar chu he state a cheng Gorkha-te, Permanent Body-in Other Backward Classes (OBC) a telh tura a rawt chungchangah Permanent Body rawtna chu pawm mai turin a ti a. Sorkar hian a pawm lo a nih chuan a pawm loh chhan chiang taka tarlang turin a hriattir bawk. Sorkar hian a pawm mai loh chhan dik tak hi court a hrilh ngam ang emaw?
Gorkha/Gorkhali ti a Mizorama kan sawite hi state thenkhatah chuan Gurkha an ti a, an lo chhuahna ram hi Nepal a nih avangin state tam takah chuan Nepali an ti mai bawk. An awmna state tam berah hnam hnawksak lo tak mai an ni a. West Bengal hmarchhak lam Darjeeling velah leh Sikkim-ah te chuan lo luah hmasatu hnamte an tam hneh avangin hnawk ti tawk chu an awm ngei ang a, he’ng hmun pahnihah hi chuan an vawk lal len viau bawk awm e.
Mizoramah hian kum 2021 khan Gorkha hi mi 7,686 an awm a. Chu chu Mizorama mihring awm zawng zawng (2021) atanga chhutin 0.59% chauh an ni a, Mizoram mihring awm zawng zawng za zela pakhat pawh an tling lo a ni. Aizawl district-ah an tam ber a, 5,318 an awm a, Champhai district-ah erawh chuan 5 chauh an awm. Mamit district-ah 76 an awm bawk. Home department-in Mizoram University mithiamte ruai a Gorkha chhiarpui an kalpui-ah hian January ni 26, 1950 hma lama Mizorama lo cheng tawh leh an thlahte chauh an chhinchhiah a. Anni tih loh hi chu Mizoram mi (khua leh tui) a pawm an ni lo.
Sorkarin Permanent Body rawtna anga Mizorama cheng Gorkha-te OBC a a rinluh ngam loh chhan hi Central YMA leh zirlai pawlte’n an dodal vang mai a ni a. Tan chhan an nei hauh lova, a pawmpui theitu sorkar dawihzep vang, leh pawl liante mitmei a ven vang mai mai a ni. Prime Minister hlui P.V. Narasimha Rao-a’n “Thutlukna siam loh pawh hi thutlukna tho a ni,” (Not making a decision is also making a decision) a tih ang chauh kha a ni a. Dawihzep thawmhnaw tih loh chuan sawi dan dang a vang khawp mai.
State dang zawng zawnga Gorkha-te dinhmun kan chhui seng lovang a. Kan thenawm Assam state-ah hian Gorkha (anni chuan Nepali an ti) hnam chi hrang 10 chuang (Gurung, Chhetri, Thapa, Lohar etc.) hi OBC-ah pawm an ni a, OBC list 17-naah an awm. Manipur-ah pawh July ni 9, 1947 atanga Manipur a lo awm nghet tawh Nepali hnam chi hrang 5-te chu OBC-ah an pawm bawk a ni.
India Parliament-in hna lak leh thil hrang hranga ngaihhnathiam, hlahthlem leh hauhsak bik atana dan a siam tawha kan hriat larte chu keini Mizo leh tlangmi hnam hnufual dang ‘Scheduled Tribe’ te, phairama awm hnam hniam leh hnufual ‘Scheduled Caste’ (Dalit tia an sawi bawk, tun hma a Harijan an tih)-te leh hnamdang hnufual hrim hrim ‘OBC’ te an ni. Hetianga sorkar laipuiin hna a hauhsak bik leh a ngaihhnathiam hnam (community/caste)-te hi a tlangpuiin state inthenawm hovah hian an inang tlang deuh pet pet a. Mizoramah erawh chuan kan thenawm state-in OBC-a a pawmte hi kan la pawm duh lo mek chu a nih hi.
Hetah hian chiang taka kan hriat hmasak tur chu keini tlangmite hian scheduled tribe tana hauhsak hi kan chanpual a ni a, scheduled caste emaw OBC-in emaw min chuhpui thei lo. Chutiang chiah chuan scheduled caste emaw OBC te emaw chanpual hi kan va chuhpui thei lo. Scheduled caste leh OBC pawh an chanpual an inchawhpawlhin an inchuhpui thei hek lo. Chutiang hrethiam (duh) tlat lo pawl lian pui pui leh zahawm tak tak, thliarkar rilru pu tlat mai kan nei hi a mualphothlakin a zahthlak khawp mai.
Mizorama Gorkha-te hi OBC nihna pek ni ta sela, keini tlangmi (scheduled tribe)-te chanpual leh chanvo min chuhpui thei dawn ta bawk sela, Central YMA leh zirlai pawlte dodalna hi Mizo mipui zawng zawngin kan thlawp ngei a rinawm. Mah se, chutiang a nih si loh chuan eng vangin nge kan lo dodal a rem kan lo tih loh ve ngawt? Buaina siam lova tute zu in hlim emaw îtsîk a zu khap lo duh ve ringawt, îtsîkna a khat thinlung hrisel lo tak atanga lo chhuak bâk a ni lovang. Mi kuta chaw tlang hmu lian ve hrim hrimte hi ngaihsan an harsa khawp mai.
Mizoramah hian sorkar laipui hnuaia awm department leh institution lian tak tak kan nei ve tawh a, kan la neih belh dawn chauh pawhin a rinawm. Tuna kan neih len zingah hian Mizoram University-te, Manipur Central Agriculture University hnuaia awm College of Veterinary and Animal Husbandry, Selesih-te, RIPANS te, Horticulture College te, Gauhati High Court Aizawl permanent bench-te hi a langsar zual an ni a. He’ng institution-te hian hnathawk tur an lak reng rengin India khua leh tui nawlpui-in an dila an chan theih hna (general category) bakah scheduled tribe, scheduled caste leh OBC te tana hauh bik an tarlang thin a, pawh pawlha dil pawlh theih a ni lo.
Permanent Body rawtna kan pawm loh avang hian enge thleng ta tih hi kan sorkar leh pawl zahawmte hian an hria em aw? Mizorama sorkar laipui hnuaia institution/department awm ve a hna ruak a awm reng rengin kan zinga cheng kumhlun Gorkha-te chu an lut thei lova, dil pawh an dil ve thei lo. Thenkhat phei chu kan makpate, ka tute an ni awm a sin! Central Agriculture University, Imphal hnuaia Selesih Vety College a OBC quota a lut tam ber chu Manipur mi an ni a. Mizoram University leh a danga lut tam ber pawh kan thenawm Assam leh state danga OBC te an ni.
Kan rilru tét leh zím luat avangin kan hnena awm reng, kan thenawm kumhlun, a then phei chu kan chhungkhat lainate chanvo diktak tur hi kan hmelhriat chu sawi loh, kan la hmuh ngai reng reng lohte’n malsawmna dawn phah na’n an hmang rei ta hle mai. Chu chu kan pawl lian hruaitute hian an hmu lo der rei ta em em bawk. Kei a ngaihdanah chuan itsikna rilru chhe tak vangin kan thenawm kumhlun, Mizote min dipdal ngai lote hi an chaw tlang kan benthlaksakah ka ngai hmiah. Chem lovin an lu kan la a ni.
Gorkha zawng zawng an fel vek e, kan ti lo. Chutih rual chuan Mizo hnamin zalenna a sual lai pawhin kan Gorkha unau tam fe hi Mizote zalenna sualchhuah tumin an rammu a sin. He’ngte hi kan theihnghilh ta em ni le? Kum engemawzat kalta-ah khan Mizoram sorkarin Gorkha-te hi tlangmi (ST) anga pawm a, an zirlaite’n tribal scholarship-te la ve se tiin inthlanna a Gorkhate thlawp beisei-in rawtna an siam a. Mah se, Gorkha zinga officer pakhat, an hnam a an Sailo ve (i ti mai ang) khan an duh hauh loh thu min hrilh. “Tribal kan ni lo” a ti.
“Hnam dang hmusit mai lovin, thianah i siam ang u,” tih hla phuahtu Rokunga lo pian chhuahna Mizo thenkhat zingah hnam dang ngai thei lo (racist) lutuk an awm a, pawl hruaitu zinga an tam viau mai bawk si hi a mualphothlak ngawt mai. Thenkhat lah hian hnam dang huat hi hnam hmangaihna (nationalism) emaw an ti ta dah a. Chiang taka kan hriat reng tur chu Gorkha chauh a ni lo, hman atanga Mizorama lo awm tawh Chakma leh Bru hote pawh hi an awm reng dawn. Ramdangmi (foreigner) nena patla khata khai chi erawh an ni lo.
A bik takin Gorkha-te hi kum tam tak Mizo zinga khawsa tawh, thenkhat phei Mizote nena inneih pawlh, Mizo tawng pawh thiam em em an ni hlawm a. Assam, Manipur leh thenawm state-ahte OBC an ni a, Mizorama an nih ve si loh avang hian kan thenawm kumhlun leh kan makpa, kan mo leh kan tu leh fate chan ve theih, central sorkar hnuai a Mizorama hna ruak awmte chu thenawm state a cheng OBC-te’n an rawn hnawhkhat ta zat zat mai a, kan zinga cheng reng Mizoram Gorkha-te erawh chu an dâwng ta reng mai a, kum tam a ni ta.
Mizoram Gorkha, kan thenawm leh mi thenkhat tana an chhungkhat lainate Mizoram chhunga central sorkar pisa a thawk thei lo tura siamtute chu pawl lian tak takte an ni. Gorkha-te chungchangah hian ngaihtuahna thar seng teh se. Kan chanai min chhuhsak a, kan chanvo min laksak tur an ni lo tih hi chianga, thliarkar rilru paihin, kan bula cheng kumkhua turte hi an chanvo i chantir ve tawh teh ang u hmiang.