- Rinfela Zadeng
Kum 1997 hnu lama piang tan chuan, a hunlaia khawvel film hmuhnawm leh hlawhtling ber – vawiin thlenga mi tamtakin an la en ‘Titanic’ film hi – hmuhnawm ti takin kan en ve thei ang em ka hre lo a. Kum 2000 hnulamah hian thil a danglam chak em em a; chuvangin tunlai thangthar lehzual te thil duhzawng inthlak danglam ta lutuk hi dem theih an ni lo.
Valentine’s Day lo thlen apianga film an la en nasat chu Titanic hi a ni awm e. A hunlai, kum 1997 atanga kum 2000 chho velah kha chuan Jack/Leonardo leh Rose/Kate Winslet te kha khawvelin kan ngaizawng a. An inhmangaihna thuk leh ril, mak mawi leh duhawm bawk si, a tawpa lungchhiatthlak lutuk bawk si khan min vêl a nih kha.
Khawvela lawng ropui ber third class ticket chu lehkhaden/pocker hmangin Jack te thiandun khan an man hlauh mai a, chu ticket hlu tak hmang chuan khawvela lawng lian leh ropui em emah chuan zinkawng zawhin an zin ve a. Jack Downson, Third Class ticket chauh nei pha khan, khatih laia Titanic lawnga mi hausa ber Caledon “Cal” Hockley/Billy Zane nupui hual, kum 17 chauha upa Rose-i kha a hmangaih ta a. An inkar kha Titanic lawnglian tak aia zau – sum leh pai hausakna khan a dang a nih kha.
Mahse hmangaihna chuan Bank Account lam hi a lo ngaipawimawh miah lo mai! Titanic lawng chuan vurtlang a sut avanga Tuifianriat mawnga a pil mek lai chuan, chhanchuahna lawngah chuan naupang leh hmeichhia te an chuang hmasa a; mahni nuna humhim tumin an buai a, an tap a nih kha. Rose-i pawh a pasal hual a hausa bawk a, chhanchhuahna lawngah a chuang mek a; Jack-a nen chuan an inhmu tawh ngai lo ang.
Mahse eng nge lo thleng kha?! Chhanchhuahna lawng atang chuan Rose-i chuan Titanic lawngpil mekah chuan a zuang let a, a hmangaih Jack-a awmna a ni tlat!
“Rose! I va han â tak! Eng vangin nge hetia i tih?”
“Ka tan i zuang tawh a, i tan ka lo zuang ve a ni. A dik em?”
He film atana hla an phuah ‘My heart will go on’ te hi vawiin thlenga Lengzem hla tha pawl a ni a, Celine Dion-i’n mawi taka a han sa phei hi chu – hmangaihna thukzia leh hlutzia hi a thar nawn awn awn thin.
Internet khawvela Pathian thu zawn hlawh ber chu Chanchin Tha Johana 3:16 hi a ni a; Lal Isua Krista chu mihringte tana Pathian hmangaihna lo lanchhuahna vawrtawp a nih thu kan hmu.
Suala avanga khawvel chhe mek leh pilbo mek, thlarau tam tak hremhmun lama an liam tur chu Pathian chuan a ngaingam ngang lo a; a fapa Lal Isua Krista chu alo tir thla tawp mai a ni. Chu tluka hmangaihna hlu leh famkim chu a awm lo.
Mahni inphatsana a nunna zawng zawng hlana kan tana lo kal Lal Isua Krista hi, lo hmangaih let ve hi a bata kan bat a ni tih i hre nawn fo ang u.