Spanish champion Real Madrid chuan nipuiah an tlarhma tichak thei tur player an ngaihven a, heng zingah hian Juventus striker Dusan Vlahovic leh Tottenham Hotspur attacker Richarlison te chu sawilan an ni.
La Liga team hian an tlarhmaah duhthlan tur neih belh chu nipui laia an ngaih pawimawh tur a ni dawn niin Madrid lama chanchinbute chuan an sawi.
Coach Carlo Ancelotti chuan tun season-ah kum 35 mi ni tawh Karim Benzema chungah rinna a nghat thui hle a, French star hi a inhliamin Brazilian player beiseiawm Rodrygo Goes chu hmang thin mahse centre-forward pangngai a ni lo.
Kum 23 mi Vlahovic hian kum 2022 January thla khan Euro maktaduai 80 velin Fiorentina atangin Juventus hi a zawm a. Turin khaw club tan match 40 khel tawhin goal 18 khung tawh mahse beisei angin an tan a la khel chhuak lo nia ngaihna a awm.
Hetihlai hian Juve hi an sum ziahluh dan a fel loh avangin hrem an ni bawk a, SerieA-ah point 15 paihsak an nih avangin season tharah UEFA Champions League an khelh phak loh chuan player hian chhuah a hreh dawn lova. Club lam pawhin sum tam tham a hralh an ui dawn lo niin an sawi bawk.
Kum 25 mi Brazil international Richarlison erawh Vlahovic aia lakluh harsa zawk tura ngaih a ni a, nimahsela Carlo Ancelotti player ngainat niin Everton a an thawhdun tawh avangin lakluh a duh.
Real Madrid hian tun season a hliamin a tihbuai Benzema thachhangdawltu tur hi anni pahnih chauh ni lo player dangte pawh an melh thova. French striker hi kum khat contract ziah belh pui tura ngaih an ni a, hetihlai hian an squad a center-forward dang Mariano Diaz erawh June thla a contract a hman zawh chuan chhuahtir tura ngaih a ni bawk.
Ancelotti hian nikum nipui khan forward thar lakluh a duh tawh a, nimahsela an player duh ang an awm loh bakah Kylian Mbappe-a’n a hnawl leh si avangin midang an lalut lo.
Marco Asensio hmalam hun a chian loh bawk avangin dinglam a khel tur forward an zawng bawk.