Sri Lanka chuan kum 2009-a an sipaiten an thah tawh, Tamil hnam hruaituin LTTE chief Velupillai Prabhakaran a la dam anga a sawi chu ‘nuihzatthlak’ leh ‘fiamthu’ ang lek a nih thu an sawi.
Tamil Nadu-a Tamil hruaitu, Pazha Nedumaran chuan Thawhtanni khan Thanjavur-ah Liberation Tigers of Tamil Eelam (LTTE) hruaitu hi ‘a dam tha’ tih sawiin, vantlang hmaah pawh a inlan leh tep tih a sawi a ni.
Sri Lankan defence ministry chuan Nedumaran-a thil sawi chu nuihzatthlak mai a nih thu a sawi.
“May 19, 2009 khan thah a ni a. DNA ennaah pawh finfiah thlap a ni,” tiin defence ministry thupuangtu, Colonel Nalin Herath chuan PTI a hrilh.
Kum 1983 atanga thliarkar rama Tamil miten ram hran an neih theih nana beitu, Pabhakaran-a ho hian Sri Lanka-ah hian tual chhung indona nasa tak a chhua a. Kum 30 dawn a liam hnuah May, 2009 khan an hruaitu lawk zualte chu sipaiten thatin indona pawh a tawp ta a ni.
LTTE hian Sri Lanka hmar leh khawchhak lam province eng emaw zat chu Tamilian-te ram atana sahthlak a nih theih nan an bei a ni.
Sipaiten Prabhakaran-a an thah ni tak hi hriat a ni lo va; mahse, May 19, 2009 khan an puang.
Hetih laia president, Mahinda Rajapaksa chuan May 18, 2009 khan kum 26 zet indona, mi 1,00,000 chuang thihna leh Sri Lankan maktaduai tel, a tam zawk Tamil-te manganna leh ram chhung leh pawna an raltlan phahna chu a tawp ta tih a puang a ni.