Hmunpui rama Ex-MNA Multipurpose Cooperative Society-in mau/raw kung 80,000 an phun zingah kung 50,000 chuang a puitling mek a, mau/rua an chinte chu hlawhtlingah an ngai.
Thawhlehni khan mau/rua chinna hmun hi chanchinbumi thenkhatin an tlawh a. Bamboo plantation enkawltute chuan Hmunpui ramah hian mau/rua chi hnih – D. Brandisii leh D. Sikkimensis kung 80,000 vel an phun atangin kung dam, puitling mek 55,000-60,000 inkar a awm niin an sawi.
Ex-MNA Multipuropose Cooperative Society Chairman C Zama chuan Mual zau takah mau/raw chi hnih hi June 2021 khan an phun tan thu leh, August 7, 2021-ah an phun zo tih sawiin, “Tun dinhmun kan en hian hlawhtlingah kan inngai a. Khawi emaw laiah a thi pawh lo awm se, mau nung tha sa, tuai thar lo awm leh tur atang hian kan phun belh leh dawn a, hei vang hian a nung tha lo te pawh ngai awh leh theih kan inbeisei a. Kan hmuh chinah kan lawm khawp mai,” a ti.
Tun hnaia Congress leh ZPM te’n mau phun puitling awm lo leh sum siamna mai nia an sawi chungchangah Society Secretary V Ramhlunsanga chuan, “A tha leh puitling lai rawn en loin, a to mumal lohna lai, nikum maia kan phun, mau/rua chinna hmun tawntirha tun dinhmuna a nung tha pawh hla tak atanga hmuh theih lohte chauh thla an rawn la a. A awm lohna leh a that lohna lai rawn hmuin, a thatna leh a hlawhtlinna lai an rawn hmu ngam chiah lo niin kan hria,” a ti.
V Ramhlunsanga chuan, tuna mau/rua chi hnih, ram hactare 170 laia zaua phun nung tha leh puitling awmna lai chu eptu party pahnihte’n enin tlawh se, an hmalakna hi a hlawhtling an tih ngei a beisei thu a sawi.
Bamboo plantation enkawltuten zawhna chhangin, tun dinhmunah mau/rua chinna hmun hi a panna kawngte hi duhthusam ni chiah lo mah se, an zirchian tawhna atangin hmar chhak state thenkhatte’n a hmunah industry an dinchilh theih dawn avangin harsatna a awm dawn lo niin an sawi a. Mau/rua chinna hmunah industry bun thei tura kawlphetha chaw lut turin ruahmanna an siam mek thu an sawi bawk.
Hetih lai hian society hruaitute chuan mau nghah puitlin chhungin bamboo shoot preservation atan khawl bun turin ruahmanna an siam mek thu leh, rawtuai tin siam thlengin hmachhawp an neih thu an sawi a. Hei bakah charcoal briquette siamna khawl bun tum niin, hemi atang hian mau vinegar lain damdawi atan hman tum a nih thu an sawi a. Rua hi a puitlin tak tak hunah chuan bamboo processing industry din tura hmachhawp a ni a, sorkar laipui lam pawh biak an ni tawh tih an sawi bawk a ni.