AIZAWL: Health Minister Dr R Lalthangliana’n tun hnai kum hnih chhunga Mizoram State Healthcare Scheme (MSHCS) hnuaia inziak lutte atanga sum hmuh chu Rs vbc 6 chuang a tlin thu house a hrilh.
Aizawl South I bialtu MLA C Lalsawivunga zawhna chhangin health minister chuan policy year, October 1, 2021 atanga March 31, 2022 chhunga healthcare-a inziak lutte registration fee atangin Rs. 3,31,67,050 hmuh a nih thu sawiin, April 1, 2022 atanga March 31, 2023 chhungin Rs 4,96,73,240 hmuh a nih thu a sawi a. Kum hnih chhunga healthcare-a inziah luhna atanga sum hmuh chu Rs 6,68,38,739 a nih tuh a sawi.
Health minister-in a sawi danin healthcare-a inziak lutte fee chawi atanga sum hmuhte chu thawktu hlawh atan Rs 3,19,37,830 hman a ni a, office mamawh hrang hrang lei nan Rs 20,47,618 hman a ni. Lirthei hmanna atan Rs. nuai 5 leh training leh meeting senso-ah Rs 1,87,304 hman a ni a, a bak Rs 3,21,65,987 chu mipuite healthcare bill atan hman a ni.
Dr R Lalthangliana chuan a mamawhtute hman turin SEDP atangin sorkar kum kal mek chhungin healthcare tan Rs. vaibelchhe 60 an dawn thu a sawi a, chu chu chhungkaw tin hnena sem ang zawng ni lovin, chhungkaw pakhatin kum khat atana an bill theih tur chin, Rs nuai 2 an dahna zawk a nih thu leh Mizorama chhungkua zawng zawng hnena sem lam a nih loh thu a sawi bawk.