Kum danga an inhralh that thin em avangin beiseina sang tak nen February 14, Valentine’s Day chu nghakhlel mah se sumdawngte an hawihai a, hmangaihna a dai ta nge? sorkar sum harsatnain a nghawng zawk?
Nimin kha Valentine’s Day a ni a, a hma ni, Thawhtanni nen khaikhin chuan Aizawlah thalai vak chhuak tam zawkin, sumdawnna hmunte pawh lun deuh mah se kum dang a tluk lo.
Dawrpui Biak In kawta gift items zawrhna dawr neitunu chuan, “Nikum lam kha chuan chhun thingpui pawh kan in hman lo va, riltam chungin kan inhralh a, kuminah erawh chuan kan dawr luah khat tur pawh an awm lo, ‘hmangaihna a dai zo ta em ni?’” tiin a nui hawk hawk.
The Zozam Times-in Dawrpui huam chhunga gift items dawr, thawmhnaw dawr leh ei leh in zawrhna dawr nghaktu a kawmte chuan kum dang an phak loh thu an sawi vek a. Dawr nghaktu pakhat chuan, “Ni pangngai aite chuan kan inhralh ve ngei a; mahse, kum dang chu kan pha lo,” a ti.
Covid-19 len hma leh len hnu, nikum lamah pawh Valentine’s Day-ah chuan Millennium Centre kawtah thalai rual an phu luih luih a, a tualah pangpar zuarte pawh kut awl hman lek lovin an sumdawng a, a chhehvel thutna awmte pawh a khat thup thin. Nimin kha chuan MC leh a chhehvel chu a lun zual chuang lo va, pangpar leh thil dang zuarte, security ten thu sawi inang an neih chu ‘Mihring an tlem khawp mai kumin chu’ tih a ni.
Kum kalta khan Hmangaihte Ni-ah hian Aizawl kawngdung a lun a, lirthei che vel pawh a buai phah a, Cable TV-a news bulletin-ah te pawh thalai vak chhuak an tam avanga khawpui a tawt thu puan hial a ni a, hei hi Covid-19 lengin Mizoram a kiansan hma a la ni a. Niminah erawh chuan traffic police-ten ni dang nen a danglam vakna an hre tam lo va, tlai lamah chuan Thawhtanni tlai thim dawn aiin lirthei tawt deuh mah se, kum dang nen khaikhin chuan Hmangaihte Ni chu traffic-in a tuar lo.
Pangpar zuar thenkhat chuan an dawra kalchilhtu tam lo mah se Thawhtanni zan atangin order an dawng tam hle niin an sawi a. Sumdawng dangte pawhin an dawr a lun loh chhan nia lang chu online-a thil chah kan uar tak vangah an puh hlawm bawk.