Aizawl : ZPM thalaiin SEDP Chakai farm-ah Chakai hmuh tur a awm lo nia sawiin, “Chakai farm-ah thlai chin a ni” an ti.
ZPM thalai hruaitute chuan an President Dr. C Lalrammawia hovin Kolasib Dum luia SEDP pilot project Chakai Farm an tlawh thu sawiin, Rs nuai 57 chuang senna, Chakai 48,000 vel awm theihna tura ruahmanah Chakai hmuh tur a awm lo niin an sawi a. Chakai awmna tura ruahmanah Dhania, Behlawi leh Broccoli-te chin a nih thu an sawi.
Chakai awmna tura ruahman plot thuma plot hnihah tui pawh a awm lo niin ZPM thalai hruaitute chuan an sawi a. Plot dangah chuan thlai chi hrang hrang an ching nia sawiin, Kolasib Dum luia Chakai farm chu MNF sorkâr hmasaka Falkawn Referral Hospital-a Ar vulh nen thuhmuna ngaih theih niin an sawi.
ZPM thalai chuan an beiseiloh ang taka Chakai farm kalpui a ni chu pawi an tih thu sawiin, “SEDP trade-ah Chakai farm chu mipuite thlan theih tura telh a nih tawh laia a sulsutu Chakai farm-ah pawh Chakai pakhatmah hmuh tur awm lova a zuihral leh si hi pawi kan ti” an ti a. MNF sorkârah kuthnathawktute khaichhuah tumna tak tak a awm lo em ni? tih chu an zawhna a nih thu an sawi bawk.