PC party President Vanlalruata’n “Mipuite phurrit budget siam ṭha kan ti lo” a ti.
Nimina PC party hruaitute thutkhawmah he thu hi an President Vanlalruata chuan a sawi a. “Kan budget tharah chuan fatu hlui a buk ṭha leh hle” tiin, “Krismas ruaia fatu tâna bel 78.90 daha mipui tâna bel 22.09 hun chhuah ang chauh a ni” a ti.
PC party President chuan “State budget han tih hluai hian ṭhenkhat chuan kan hriatthiam phâkloh thil emaw kan ti ṭhin” tiin, “Hriatthiam awlsam dân ber chu Krismas ruai ang deuh hi a ni mai, tih hriat hi a ni” a ti bawk.
Vanlalruata chuan “Krismas ruai kan ṭheh dawn chuan ruai ṭheh nâna kan mamawh chhût chhuakin senso tûr chu mi hrang hrangin kan thawhkhawm tûra ruahman ṭhin a ni a, kan thawhkhawmin a daihlohna chu kohhran committee-in a phuhrûk dân an zawng leh mai ṭhin” tiin, “kan state budget chu sa bêl 100 chhum tûr anga ruahman a ni ta a; he bêl 100 tûr zînga bêl 81 deuhthaw (80.84%) chu mipui thawh tûr leh mipui tâna central atanga pawisa lo kal tûr hmanga lei tûr a ni a; a bâk bêl 19 leh tlem (19.16%) chu a pûka pûk tur a ni, hriatthiam loh tham a awm lo” a ti.
“Kan ruaiṭheh tûr sa bêl 78 deuhthaw (77.89%) chu hlawh leh inrelbawlna atâna hman tûr niin fatu hluiah a kal ta a. Bêl khat pawh tling lo (0.01%) chu rulh leh tûra midang pûktîr tûr nîin hei hi MLA te pûk tûr a nih avangin fatu hluiah bawk a kal dâwn a, tichuan, fatu hluiah bel 78 deuh- thaw (77.90%) dah a ni” tiin, ”Sa bêl 100 ngawt awmna ruai chu kan tlai dawn mang e, tia phûr taka ruaitheh tum mipui tân bêl 22 leh tlem (22.09%) chauh an zuah ta a nih chu” a ti bawk a ni.