- Kima Mivam
Naupang lo thang chuan a nu leh pa atangin nunphung a zir chho a, tam tak la chhawngin chhungkaw zia chu a rawn nun chhuah pui ta thin a ni. Khawtlangah pawh hian kan nu leh pa, pi leh pute tih thin dan chu kan chhawm zel a, chu chuan khawtlang nunho dan nghet leh tha min neih tir a ni. Kohhran ze laipui pakhatah pawh Kohhran hmasate tihdan chhawm nun zel hi a ni a; khawtlangah pawh hian kan pi leh pu ten an thu rolum leh an lo tih thin dan chu kan dah pawimawh em em a, han paihsak mai emaw, an lo tih thin dan han kalsan chu tupawh mai hian kan hreh a ni.
Hun lokal zelah, tun hmaa kan pi leh pute tih than, loh theih lohna avanga kan chhun zawm theih tak loh a awm nual ang a; Zualko kal te, Mi zawn inchuh te leh a dang dang pawh tunlai chuan kan kalsan chiang ta viau a ni. Changkannain a ken tel an ni a, inbiakpawhna a lo that tak avang leh lirthei a lo tam tak avangin kan pi leh pute tih thin dan hi chhunzawm reng tum mah ila, a ngaihna a awm tawh lo a ni ang. Thingtlang kilkhawr berah pawh kan chhunzawm lo tih theih a ni ta.
Chutih mek lai chuan Thlanlaih chungchang hi han sawi ta bik ila. Tunhma kan pi leh pute kha tharum hmanga eizawng ho dial dial an ni a, an hna thawh a in ang a, an chawlh hun pawh a in ang tlang em em a, inthurual pawh an awlsam phah viau a ni. Chutianga an nundan a in an tlan avang chuan khawtlang nunhona kha a insiam tha em em a, an thawk ho tha a, puih ngai an awm leh tlawmngaihna chhuah a ngaih thu hlaah pawh, a bang bik awm lovin an thawkho dal dal thei thin a ni. Tlawmngai bik pawh inthlan chhuah nalh a har viau lovang. Thlanlaih chungchang bikah phei chuan, tharum hmang thang vek an nih avangin lei laih chak lo bik kha an awm lo ang; han chak fal leh tharum ngah fal lo awm bawk thin mahse, a nawlpui kha tharum hmanga eizawng an nih avangin thlan laih na na na chu mi tlemte pawhin hnehsawh takin zing kar hun reilote chhungin an lai zo mai thin a nih kha. Tunlaiah chuan a nawlpui hian tharum aiin thluak kan hmang nasa ta a ni, a tih theih ang a, tharum hman a ngaihnaah chuan hman lai kan pha thei lo hrim hrim bawk ang.
Tun lai khawpui thalaite nun han thlir ila, a tam zawk chu tharum hmang lovin ei an lo zawng ta a; a thenin dawr an nghak a, a then office lamah te thuin, a then sikul lamah te an thawk ta nawk hlawm a. Anni tan hi chuan tun hma kan pi leh pute hunlaia hnehsawh taka, zingkara thlan an lai thin ang kha chuan an hnehsawh ve thei ngawt ta lo a ni ber ang chu. Chuti chung chung chuan thlan laih a la ngai si a, veng thenkhatah chuan thlanmualte a lo hlat avangin, sawrkar chawlh remchangah thanlaih hnatlangte koh a ngai ta hial a ni. Hei pawh hi kan pi leh pute duh loh kha chu a ni tawh ngei mai a, thlan laih lawk hi chu an duh ngai lo a nih kha! Chubakah eizawnna a in an tak loh avangin hman hun a in ang lova, buai tak taka kartluan hmang a, kartawp lama awl leh em em an awm a, a then company lama thawk te phei chuan kartawp Pathianni deuh chauh hi an hunawl neih a lo ni ta. A then chu zing kar atanga, hotute hnuaia hna thawk an lo ni ta bawk. Chutiang hun chu kan thalaite khawvel a ni mek a.
Intodelh tura zirtirtu nu leh pate hian kan thalaite dinhmun hi kan thlir pui a ngai ta viau a ni. Thlan lai tur hian thalaite an peih ta lo pawh a ni chiah lo ang a, an hun neih danin a zir lo te pawh a ni ang, Zan lam an hman tlangpui avangin zan lama thlanlaih te ni ta zawk se hei ai hian thalai thlanlai an thahnem mahna. Nge ni ang a, Khawvel ram changkang zawkte angin Thlanmual enkawltu bik (Undertaker) hi kan in ruai tawh mai zawk dawn? Veng lian vak loah pawh hian Pathhian ni chawhma kan thawhlawm tling khawm hi Rs 20,000/- te a ni tawh hlawm a, (Naupang leh Puitling sande sikul thawhlawm belhkhawm) chuti anih chuan, Thlanmual enkawltu rawih hi thil harsa chu a ni lo tih a lang reng mai. Tin, tu emaw tan eizawnna kan siam sak a ni bawk ang. Kan kal dan ngai reng hi zawm theih loh chin kan nei vat dawn a, thil thar tha si ngaihtuah chhuak hmasaa, hmang ngam YMA chu, kan thalai intodelh chaka tuihalte tan hian an la hlu dawn chauh a nih hmel.