Hyundai chuan an midsize sedan hmingthang Verna chhuak thar tur chu a video tawi, mipuite rawn chhaih zeuhna tih te pawhin a sawi theih ang a, ‘teaser video’ an tichhuak a. Hei hi lirthei thar a chhuah dawn a, TV leh Internet platform hrang hranga kan hmuh thin ang kha a ni a, Hyundai chuan official teaser an rawn tichhuak ve tan a, May thla hian an tlangzarh theih beisei a ni.
Hyundai Verna thar tur chungchang hi a hma pawh khan kan lo tarlang tawh a. March thla atanga an siamna hmunpui lama siamchhuah runpui tan tur a nih thu te kan lo hre tawh a. Tunah hian company lam chuan teaser video an tihchhuah mai bakah booking pawh an hawng ta a, Rs. 25,000 chawiin a lo book lawk theih tawh a ni. Hei mai bakah hian chi hrang eng ang nge awm dawn tih te, a khawl hman tur te pawh company lam chuan an puangzar tawh a ni.
A teaser atangin eng nge kan hmuh
The new Hyundai Verna sports a completely new design and, as the teasers show, the styling has been influenced by quite a few latest-gen Hyundai sedans.
Hyundai Verna thar tur lam dan tur hi a teaser-ah hian a lang ruak a, Hyundai sedan tunhnaia chhuak ho design ang a rawn nei tawh dawn a ni. Hmundang market-a Hyundai Grandeur design kan hmu ang deuhin a hma bawr hi duan ve a ni a, a grille bawr hi Hyundai Tucson thar ber design ang deuh a ni a, hmundanga Hyundai Elantra chhuak mek te nen pawh a inzul deuh a ni. Verna thar tur hian ull-width horizontal LED light bar a nei dawn a, hei hi daytime running lamp (DRL) a ni dawn a. Hei hi khawvel hmundanga Hyundai lirthei Staria leh Grandeur-ah te pawh kan lo hmu tawh a ni.
A lirthei pang lam, a kawngka bawr hoah pawh tunhnaia Hyundai design language thar ber chu kan hmu dawn bawk a. A hnunglam pawh a danglam viau dawn a, a hnung light pahnih te hi LED light bar in a thlunzawm ang a. A ruangamah hian danglamna hrang hrang kan hmu ang a, khawvel huapa Hyundai car mawi tak tak ho design a rawn pawl chhoh dawn avangin a mawiin a changkang viau dawn a ni. .
A khawl lam
Hyundai India chuan thil hrang hrang an lo puan lawk tawh zingah a khawl hman tur hi a tel a. Hyundai Verna tharah hian 1.5-litre ve ve petrol khawl pahnih duhthlan tur a awm dawn a. Pakhat zawk chu 1.5-litre direct injection turbo-petrol khawl niin hei hian 160hp power a pechhuak thei a. He khawlah hian 6-speed manual leh 7-speed DCT automatic te duhthlan tur a awm a ni. He khawl hi Hyundai-Kia model hrang hrang Creta, Seltos leh Carens-ah te pawh hman chhoh a ni dawn a, tuna 1.4-litre turbo petrol khawl hi a thlak dawn a ni.
A khawl dang lehah chuan 1.5-litre naturally aspirated petrol niin hei hi chu turbo ni lo, petrol khawl pangngai ang a ni dawn a, he khawl hi a variant tlawm hoah kan hmu dawn a ni. 6-speed manual gearbox emaw IVT CVT automatic emaw transmission lamah chuan duhthlan tur a awm ang.
Diesel khawl hmang a awm dawn lo niin a lang a. A elpui hrim hrimah pawh hian diesel khawl hmang tel hi an awm ta meuh lo a ni. Hyundai chuan Verna khawl te hi RDE bakah E20 (20 percent ethanol blend) compliant a ni vek dawn tih an puang tel bawk a ni.
Variant hrang hrang
Verna thar tur hi EX, S, SX leh SX(O) te duhthlan tur a awm leh dawn a. 1.5-litre TGDI engine hi a variant sang ho hman tura beisei a ni a, tarlan tawh angin a intanna variant hoah chuan 1.5-litre Naturally Aspirated petrol khawl kan hmu dawn thung a ni. Verna thar tur hi single tone rawng chi 7 leh dual tone rawng chi 2 te duhtlan tur a awm dawn a. Rawng thar hlak pathum – Abyss Black, Atlas White leh Tellurian Brown te Verna lo chhuak turah hian a awm thar dawn bawk a ni.