La Liga a beisei pha lo mek Valencia chuan an coach thar atan an club legend an lalut a, midfielder Ruben Baraja chu Gennaro Gattuso thlaktu ni turin Thawhlehni zan khan an lalut.
Baraja hian inkhelh a chawlhsan hnuah Spain-ah coaching hna thawkin second division club-te a enkawl nual tawh a. Tunah hian match 21 an khelh hnua 18-na ni mek Valencia hi tlak hlauhawm atanga hruai chhuah a tum dawn.
Valencia coach hlui Gattuso hian thla hmasa khan result an neih chhiat zawn avangin club a chhuahsan tawh a. Interim coach Voro Gonzalez hnuaiah Los Che hi vawi thum inkhelin an tlawm vek.
Valencia chuan thuchhuah siamin, “Baraja hian kan club sukthlek dan leh kan kalphung chiang takin a hre tawh a. A inpekna sang tak nen he club tana theihtawp chhuah tur hian a inpuiah a lo haw leh a ni.” tiin an coach thar lakluh thu an puang.
Baraja coaching staff-ah hian Valencia tana a inkhelhpui thin Carlos Marchena pawh a tel ang.
Tunge Baraja?
Kum 47 mi Spain tana vawi 47 inkhel hi midfielder fing leh ball thiam a ni a. A hunlaia Valencia thluak bur a ni thin.
Kum 2001-02 leh 2003-04 a La Liga title an chawi theih chhan niin UEFA Cup leh Copa del Rey-te Los Che tan hian a chawi tawh bawk.
Valladolid a piang niin Real Valladolid-ah bul a tan hnuah Atletico Madrid ah a khel leh a. A vanglai hun tam ber erawh Valencia-ah hmangin an tan vawi 364 a inkhel hman.