AC Milan in kum 11 chhunga a vawikhatna atan UEFA Champions League quarter-final khel turin ke an pen tan a. Tottenham lakah 1-0 a hnehna changin round of 16 first leg-ah an chak.
Tottenham in an mual a second leg khelh hunah ‘comeback’ hnehna an chan a ngai tawh dawn a. An tan chetsual a thiang lova, Milan lakah tha taka an khelh a pawimawh tawh hle ang.
San Siro a Thawhlehni zan inkhelah Milan tan Spanish midfielder Brahim Diaz chuan minute 7-naah inkhel a goal awmchhun hi a tauh lut a. Theo Hernandez-a ball pet chu Spurs goalkeeper Fraser Forster chuan a dansak hnuah a per let atangin a khung a, Forster hian a dansak leh thei teuh.
Vawi sarih champion tawh lakah Antonio Conte pawlte an khelchhe bik lo, hei hian beiseina a siam ang. Muallaiah tawnhriat la ngah lo Pape Sarr leh Oliver Skipp te inkawp an kheltha a, hei hi an tana lawmna dang tur a ni.
Nimahsela an tlarhma a Harry Kane, Son Heung-min leh Dejan Kulusevski te inkawp ven hneh an ni hle.
Milan coach Stefano Pioli chuan, “He inkhel atana inbuatsaih hi thil harsa a ni lo. A chhan chu kan inbitum dan tur kan hre lawk sa. Ka player te an inkhelhdanah ka lungawi hle.”
“Goal hnihna khung thei tur kan ni a, chance tha kan nei nual, first leg chauh nimahse a lawmawm.” tiin a sawi.