Formula 1 team lian Mercedes-AMG Petronas F1 Team chuan kum 2023 season a an car hman tur W14 an phochhuak a. Team boss Toto Wolff chuan an car thar chu nikum car atang hmasawnna niin kuminah an um tur pahnih – Red Bull leh Ferrrari te an el phak theih thuaina a nih an beisei thu a sawi.
England a inkhuar, German license nei team hian nikum khan a zawna vawi riat constructors’ title an lak hnuah nasa taka tlahniamin Red Bull Racing leh Scuderia Ferrari te an pha lo hle a. An car siam a fuh loh avangin season tirah an buai a, season tawp lamah erawh hmasawnna neiin dawhsan chuhpha zingah an tel chang a awm ve hman.
Nikum khan an car hian sawihlawh takin ‘sidepod’ tia sawi tur a nei lova, hemi design hi la ringin kuminah erawh an car sawt nasa lutuk leh engine lama midang an phak lohna siamtha tawh tura ngaih an ni.
Team principal Wolff chuan, “Kan ngaihtuahna kan la seng reng a, a chak tawk em? Kan harsatna neihte kan siamtha em tih kan inzawt reng. La sawi thui theih loh mahse hmasawn turin kan thawk reng a, George leh Lewis ten car tha an neih thuai kan beisei.” a ti.