Milwaukee Bucks-ah star player langsar tak pakhat awm mahse an player tha dang Jrue Holiday-a’n NBA All-Star a nihna chhan a pholang a. Inkhel vawikhat a point a score hnem ber tum chu tlukin point 40 a score naah 131-125 in Boston Celtics lakah overtime-ah a team a chakpui.
Holiday hian NBA-ah vawikhat a point a score hnem ber chu 40 niin hemi record hi a tluk a. Second 25.2 chauh a awm tawhin overtime-ah 3 pointer pawimawh a lut a, a team in a zawna vawi 11-na atan hnehna an chan theih phah.
Kum 32 mi Holiday hian 3 points vawi 12 a shoot atangin vawi 8 a lut a, inkhel vawikhat a a luh hnem ber tum a ni.
Tun Pathianni a All-Star Game a khelhpui tur Giannis Antetokounmpo chuan point 36, rebound 13 leh assist vawi 9 a nei ve bawk.
Bucks hi Eastern Conference-ah vawi 40 chak a vawi 17 chiah la tlawm an ni a. An chungah vawi 41 chak a, vawi 17 tlawm Celtics an awm mek a, an pahnih hian conference bakah league a record nei tha ber nih inchuhin an intlansiak mek.