New Zealand prime minister chuan an rama North Island nuaitu, Cyclone Gabrielle chu chhuan tam tak an hmuh tawh lo khaw awm dan tha lo tak a nih thu a sawi a. Mi pathum thi an awm tawh.
Chris Hipkins-a sorkar hian a hmain emergency a lo puang tawh a, hei hi New Zealand ram chanchina a thlen vawi thumna chauh a ni.
An rama mihring maktaduai nga vel cheng zinga hmun thuma thena hmun khat zetin an tuar a ni.
Nilaini khan cyclone hi chak lo hret tawhin North Island a chhuahsan fel a; mahse, mi tam tak chenna tur nei lovin an la awm rih mek.
Mi tam tak chu lui kuang luang liam nasa avangin an in atanga tlan chhuak turin tui hleuh a ngai a, thenkhat chu in chunga an tang chhanchhuah an ni bawk.
Mi cheng hmun lia thena hmun khat chuangin power an la nei thei lo va. Thing tluin in a delh a, hmun tam takah lei minin kawngpui a tlang lo bawk.
Gabrielle-in chhiatna a thlen tamna ber hi tuipui kam, an ram hmar tawp leh North Island khawchhak kil a ni hlawm a. Hawke’s Bay, Coromandel leh Northland chu a tuar na ber ber an ni.
Khaw pakhat phei chu lui tui lian avangin a kalpawhna zawng zawng a chhe vek rih.
Civil defence thuneitute chuan chhiatna thlengte chu anmahni mai chuan an dawl zo rih lo tih an sawi a, Australia leh UK chuan puih a tiam.
Nilaini khan Hawke’s Bay-ah mi pahnih an thi tih finfiah a ni.
Thuneitute chuan Auckland khawpui khawthlang lam, Muriwai-ah lei mina chin hriat loh kangthelhtu pakhat ruang chhar a ni bawk tih an sawi a. A thawhpui pakhat chuan hliam na tak a tuar bawk.
Tualchhung chanchinbute chuan Hawke’s Bay-a cheng mi thenkhat chu an mut pindan tukverh atangin tui hleuh chhuakin hmun him an pan a. Mi thenkhat chu chawlhkar eng emaw zat power nei lo tura tih an ni.
Vansang atanga thlalakah chuan tui lenna hmunah hian mi thenkhat chu an in chungah lawnin chhanchhuah hun an nghal hlawm tih a hmuh theih.
Thing a tlu a, kawtthlerah street lights leh ban hrang hrang a tlu a, tuiin in a chim nasa hle bawk.
“A thawh dan leh chhiatna thleng hi chhuan tam tak kan lo hmuh tawh loh a ni,” tiin Hipkins chuan Thawhlehni khan a sawi.
“Cyclone avanga chhiatna thleng kan hre mawlh mawlh a, eng ang chiahin nge kan tawrh dawn pawh kan la hre kim lo zawk,” a ti.
Chhiatna thleng tuartute tanpui nan NZ$ maktaduai 11.5 pek a tiam nghal.
Thawhlehnia emergnecy a puan khan Emergency Management Minister Kieran McAnulty chuan cyclone thawk chu ‘rin phak bak’ a nih thu a sawi.
Emergency puan hnuaiah hian sorkarin chhiatna thlengah chet lak dan awlsam zawk a nei a. Northland, Auckland, Tairawhiti, Tararua, Bay of Plenty, Waikato leh Hawke’s Bay region-ah te puan a ni.
New Zealand hian tun hmain emergency puan tum hnih chauh a la nei a, Covid-19 len tan leh 2011 Christchurch lirnghingah khan a puang.
Cyclone Gabrielle-in New Zealand a nuai hma lawk hian ruah tam tak an lo dawng tawh a, tui nasa taka lianin mi pali an lo thi tawh a ni.