Borussia Dortmund in Chelsea lakah 1-0 a hma hruai lailawk turin hnehna an chang a. Karim Adeyemi goal khung chu Nilaini zanah an chakpui.
UEFA Champions League round of 16 first leg inkhel hi Westfalenstadion-ah nghah a ni a. Chelsea in January a nasa taka an thuam that squad chu fiahin an awm.
Dortmund tan Adeyemi chuan minute 63-naah ‘solo’ goal mawi tak mai a khung a. Dortmund in phu takin hma hruai mahse Chelsea chance hlah zozai a uihawm.
Premier League team hian first half-ah Joao Felix hmangin chance tha vawi hnih an nei a, a hnuhnung zawkah crossbar a pet per.
Reece James chuan Dortmund goalkeeper Gregor Kobel chu save tha tak vawi hnih lai a siamtir bawk. Mikhual team lamin inkhel a kal rei zel tihin inrintawkna an neih belh zel a, amaherawhchu a hmawr an bawk theih loh an tuar.
Chelsea buaina a ngai – goal an khung thei lo
Mahni mualah Dortmund in an mikhualte an thunun thei lova, first half-ah tlan taima viau in counter-attack atang team hlauhawm nimahsela Chelsea chu inkhel a langsar zawk an ni thin.
Chelsea goal chhuahna pawh an corner hmuh atanga ball kal let a ni a. Adeyemi a tlanchakzia in fak a phu.
Chutihrualin Blues in goal khung let ve an phu tih an tilang a, a hmawr an bawk theih loh erawh insiamthat a ngai ang.
Kalidou Koulibaly goal khung tur Emre Can chuan goalline-ah a dansak a. Enzo Fernandez pawhin khung teuh hle in Kobel bawkin Dortmund a chhandam.
Blues hian thlasik bazarah player pariat an lalut a, heng zinga langsar pathum – Mykhailo Mudryk, Fernandez leh Felix te Champions League khel tura ziahluh an ni a, inkhel bul an tan vek.
Chelsea goal nawr chu ti na sawt mahse striker pangngai hriam tak, a hmawrbawktu tur an neih loh an tuar.
Shot on target nei turin darkar khat dawn an nghah a ngai a, an neih hmasak ber pawh wing-back James-a freekick a ni.
An khingpui Dortmund an kheltha em em bik lo, chutihrualin an huntha neihah Adeyemi a hriam a, team pahnih inkara danglamna a ni.
Chelsea hian Stamford Bridge a return leh khelh hunah an dinhmun an la siamtha thei. Chutihrualin November thla hnuah inkhelah goal khat aia tam an la khung leh loh avangin a hmalam an insiamthat a ngai viau.
Chelsea boss Graham Potter chuan, “Kan team-ah hian chak duhna thinlung chu a awm. Kan lamah vanneihna a tan ve deuh a ngai a, zaninah pawh kan theihna sang ber in kan khel lo chungin kan khel chhe lo. Hmasawn zel kan ngai a ni.” tiin inkhel a thlirlet a.
“Kan goal chhuah kha kan tihsual ho tak a ni a, khatiang kha a thleng tawh tur a ni lo. Team tha zawk kan ni a, a nawrtu zawk kan nihlaiin goal kan chhuah.” tiin a sawi.
Benfica dinhmun a tha
Benfica in Club Brugge an hmachhawn a, second half-ah goal hnih khungin 2-0 in hnehna changin an haw.
Jan Breydelstadion a inkhelah Benfica tan Joao Mario chuan minute 51-naah penalty atangin goal hmasa zawk a khung a. David Neres chuan huntawp dawn lamah an goal hnihna a khung.
Brugge hi English coach Scott Parker hnuaia khel an ni a, an tualchhung league a an chetthat loh lai a ni bawk a, hei vang hian second leg an tan a huphurhawm tawh viau.
Hetihlai hian Benfica hi UEFA Champions League a an chetthat tluan lai ber a ni a, tunah hian a zawnin vawi 8 tlawm lovin an kal mek.