Premier League champion lai in an lallukhum awlsam taka hlanchhawn mai an tum lova, November thla hnua a vawikhatna atan table chung ber luah turin Manchester City in 3-1 in Arsenal an hneh.
Nilaini zanah Emirates Stadium-ah Premier League hmahruaitu in anmahni umtu City an mikhual a. Second half-ah mikhual team in an thatna lantirin Arsenal an chil hneh a, chhanlet loh a goal hnih khungin an chak.
Gunners in inkhel pawimawhah tihsual an neih thin an tuar a. Minute 24-naah tihsual hmasa ber tuarin Takehiro Tomiyasu backpass tha tawk lo chu Kevin de Bruyne chuan mawi tak maiin an goal hmasa ni turin a khung.
Halftime dawnah Arsenal in an sut a, City goalkeeper Ederson chuan Eddie Nketiah lakah penalty a chawi a, Bukayo Saka chuan goal-ah a khung.
First half-ah City inkhel a nung lova, Arsenal in football mumal zawk an khel. Second half-ah erawh City an insiamtha a, team hlauhawm zawk an ni.
Erling Haaland-a’n penalty a hlawhchhuah nia lang chu a offside avangin hnawl a ni a. Mahse minute 72-naah Bernardo Silva leh Haaland te thawhrah sengin Jack Grealish chuan goal a khung a. Minute 10 a kal leh tihin Kevin de Bruyne ball pek fing tak chu Haaland-a’n an goal thumna atan a khung.
Manchester City boss Pep Guardiola chuan, “Inkhel kha halftime hma leh hnu angin a thlir theih. An ball inpek kual dan a that em avangin an laka inkhelh hi a awlsam ngai lo. Mahse kan beidawng duh lova, a tawpah kan player-te theihna sang in danglamna a siam.” a ti.
“Khelh tur a la tam a, Champions League leh Europa League a la awm, mahse zaninah tlawm ila, kan inumna a zo tluk a ni tawh ang.” a ti bawk.