Turkey-a lir a nghin atanga ni kua zet a liam hnuah in chim kar atangin hmeichhe pahnih lak chhuah an ni a, an lo la dam.
Kum 42 mi, Melike Imamoglu leh pitar kum 74 mi, Cemile Kekec te hi Kahramanmaras khuaah chhanchhuah hna thawktuten an la chhuak a ni.
Thawktute hian khawpui chim chhia an thenna lamah an hmu chhuak leh hlauh a ni.
Kar kal ta Thawhtannia lirnghing avang khan Syria leh Turkey-ah chuan mi maktaduai tel chu camp siam chawpah chengin puihna an mamawh hle.
Darica Mayor Muzaffer Biyik-a’n social media-a video a dah chhuahah chuan chhan chhuaktuten an lak chhuah hian an hlimin thawm pawh a tha hle a, ambulance-ah hlan nghal an ni.
Tual chhung chanchinbute chuan Imamoglu-i an lak chhuah hian ‘i va turu em em ve’ tiin an lo lawm niin a tar lang.
Turkey thova Antakya khawpui, lirnghingin nasa taka a sawi chhiatnaah pawh nu leh a fate pahnih chu in chim karah damin an la chhuak leh bawk.
Lir a nghin atangin ni 10 a liam tawh a, dama lak chhuah tur an tam tawh lo le a. Ram pahniha thi zat hian 41,000 a pel tawh.
Lir a nghin hnu lawka ram dang atanga chhan chhuah hna thawk tura lutte pawhin an hawsan tan hlawm a, tual chhung mite pawhin hnawk then lam an buaipui tan ta bawk.
Dam chhuangte hian bul an tan thar leh a ngai dawn hlawm a. Turkish sorkar chuan mipuite chu hawna tur in an la nei a niha thuneituten a him an ti a nih chuan haw leh tawh turin an ngen hlawm.
Mi tam tak erawh hawna tur nei tawh lo niin camp-ah an awm a. Kahramanmaras-ah chuan khelmualah mi 1,000 chuang an khawsa mek.
Syria-ah phei chuan puihnate chu tual chhung indona a awm mek avangin a thleng hleithei lo.
UN chuan ni eng emaw zat Syria hnenah puihna a pe lo va, inkalpawhna leh thawn dan a awm loh vang niin an sawi.
Turkey atanga luhna hawn belh a ni a, puihna a thleng thei tan a; mahse, in chimte thenna tur khawl lian erawh pek an ni lo niin chhanchhuah hna thawktuten an sawi.
“Hetiang hi tun hmain a la thleng lo, lir a nghinna hmunah ram dang leh UN-in a puih loh hi a la thleng nghal lo,” tiin eptu lamin an awp mek lai hmuna White Rebels rescue force kaihruaitu, Raed Saleh chuan a sawi.