February 27-a Nagaland assembly inthlan turah BJP chuan hming langsar tak tak campaign turin an chhawp chhuak.
Nagaland-ah hian bial 60-ah inthlan tur niin March 2-ah vote tlate chhiar a ni ang.
BJP chuan tlin tum ngeiin an bei mek a, Prime Minister Narendra Modi, Union Home Minister Amit Shah leh party president JP Nadda te chu an thawk chhuak dawn.
Nagaland-ah hian BJP-NDPP (Nationalist Democratic Progressive Party) an thawkho.
February 24 hian Modi-a hian Dimapur-ah hun a hmang dawn a, chief minister leh NDPP President Neiphiu Rio chuan a tawiawm dawn.
Shah pawhin February 20 leh 21-ah a chamchilh dawn a. Union home minister hian chief minister nen Dimapur-ah kawng zawhin Mokukchung khua a tlawh bawk ang.
Assam chief minister, North East Democratic Alliance (NEDA) convenor ni bawk, Himanta Biswa Sarma pawhin Inrinniah a tlawh dawn bawk a. Bhandari, Alongtaki, leh Pughoboto velah BJP-NDPP candidate-te tan hun a hmang ang.
Assam chief minister hian Modi leh Shah te hun hmannaah a tawiawm dawn bawk a. Nadda-a’n a tlawh hun tur erawh la tihchian a ni lo thung.
BJP leh NDPP hian an thawhhona awm sa chu an chhunzawm leh dawn a. BJP chu bial 20-ah dingin NDPP hian bial 40-ah an chuh ve thung ang.
CPI-in candidate pakhat, Congress-in 23, NCP leh NPP-in 12 ve ve, NPF-in 22, RPP-in pakhat, JD(U)-in pasarih, LJP (Ram Vilas)-in 15, RPI (Athawale)-in pakhya leh independent-a chuh mi 19 an awm bawk.
Nagaland-ah hian vote nen mi 13,17,632 awmin an zinga mi 6,61,489 chu mipa niin hmeichhia 6,56,143 an awm bawk.
Polling station 2,351 awmin Merapani polling station No. 71, Bhandari biala mi chu voter tlemna ber niin 37 chauh an awm a, Atoizu biala Usutomi polling station No. 12 chu an tamna ber niin 1,348 an awm.
Mokokchung Town bial chu voter tlemna ber niin 8,302 an awm a, Ghaspani-I bialah erawh 74,395 awmin a tam ber an ni.