MPCC Action Committee buatsaihin nimin khan Mizoram hmun hrang hrangah MNF sorkar duh lohna leh Zoram Chhanchhuahna thuziak tar hnatlang a ruala neih a ni.
Transport Office kawt, Zodin Square-a thuziak tar hnatlang puala inkhawm buatsaihah thu sawiin MPCC Vice President Lal Thanzara chuan, “MNF sorkarin SEDP nuai thum semin chak takin sorkar an kalpui kan lo beisei a. Mahse, kum li kan thlir hnuah thil awm dan hi a beidawnthlak takzet a ni tih Mizoram mipuiin kan lo hre ta. Chuvangin, Mizoram pumah poster tar hnatlang kan nei ta hial a ni,” a ti.
MNF sorkar thar a pian veleh Lengpui Airport-ah sum tam tak a awm tih an hriat avangin an duh ang tawka an suasam theih nan aviation-a officer fel tak chu an pet chhuak nia sawiin Lal Thanzara hian, “CM-in duh duh a sum a zenpui theih tur principal consultant an indah a. Airport enkawltu hnathawktu turte pawh a nghet lo hlira dah an ni,” a ti a. Airport chei that hna chief minister-in a tlawh tlut tlut a, chuta hna thawk tura a thlan chu hnam dang contractor, Kamrula Chhangte leh CM tupa an ni a, airport suasamin an duh tawkin hma an la a, an hmarua leh bungrua hmante a chhiat avangin a chim phah nghe nghe niin a sawi.
Lal Thanzara hian healthcare-ah mi harsate inenkawlna turin cheng nuai hnih thlengin SEDP atangin dah a ni tih CM-in puang mah se, assembly house-a an tar lan danin healthcare bill ba vaibelchhe 65.9 a awm a ni tih hriat a ni a. Dam lo chhungkua apiangte hman atana SEDP healthcare cheng nuai hnih an dahna sawi turin a phut tih a sawi.
MNF sorkar chu sum leh pai enkawl kawngah a hlawhchham tih sawiin, “Mizoram sorkarin leiba a ngah em em a, puk tur an zawng reng a. Sorkar hnathawkten a hunah hlawh an la thei lo a, pensioner-ten pawisa an la thei lo a, damloten healthcare pawisa an dawng thei hek lo,” a ti.
ZPM chungchang sawiin MPCC vice president hian, “Tuna ‘min enchhin rawh u’ titute hi party tinin kan lo enchhin tawh te, party hrang hranga lo awm tawh kalkhawm, vote hmu sang ngai miah lote an ni,” tiin, enchhin an duh hrim hrim a nih chuan ‘kan ti ang’ tih chu ti mai thin Congress party an awm tih a sawi.
Congress sorkar kum 10 chhung khan mipui tihlungawi lohna tam tak an nei tih an pawm thu a sawi a. Mahse, tunah chuan an danglam tawh dawn tih sawiin, “Pu Lalsawta hoin sorkar tha siam hi kan tum tak tak a ni,” tiin Mizoram mipuite, NGO hruaitute, sorkar hnathawkte, damdawi lam thiamte sorkar tha siampui turin a sawm a ni.
He hunah hian Lalrobiaka, Ex MLA, President, ADCC; Vanlalawmpuii Chawngthu, President, Mahila leh Dr. Lalmalsawma Nghaka, President, MPYCC-ten thu an sawi bawk.
MPCC in an tar lan danin Aizawl khawpui chhung bakah khaw hrang hrang 150 chuangah a ruala tarin, thu ziak 15,000 vel an tar a ni.