New Zealand prime minister chuan tun hnaia ruah leh thlipui na tak an tawrh avanga thi chu an pun ngei a rinawm thu a sawi a, mi pariat thi awm tawhin mi tam tak biakpawh leh tlawhpawh theih lohvin an la awm.
Cyclone Gabrielle-in Thawhtannia a nuai hnuah khan mi 4,500 chuang pawh theih lohvin an la awm a. North Island-ah chuan nasa taka tui lianin lei a min nasa hle bawk.
Khawpui leh thingtlang hmun tam takah power leh tui in tur thianghlim an la nei lo.
New Zealand chanchina a vawi thum nan chauh emergency an puang hial a ni.
“Tun kum zabi kal mek chhunga khuarel chhiatna kan tawrh nat ber a ni tih phat rual a ni lo,” tiin Prime Minister Chris Hipkins chuan a sawi.
Thlipui thawk hian mobile phone mast tam tak a titlu a, Hipkins-a chuan mi tam tak an la biakpawh theih loh phah thu leh dam leh thaa an awm ngei an beisei tih a sawi a. Hetih rual hian mipuite chu ‘thi zat tak zawk’ hre tura inring turin a ti bawk.
Mi 10,000 vel chenna tur nei lovin an awm phah mek bawk.
Thi zinga pakhat chu hmeichhe naupang kum hnih mi lek, a chhungten tui lianin a la lai an thlir liam a ni.
Ella Louise Collins, a pasal leh an fate pahnih hi tuna chhiatna an tawh tuar na ber, Hawke’s Bay-a in chhawng khata cheng an ni.
“Tuiin kan ceiling a tawh lohna chu cm 10 chauh niin rang takin a chim sang a ni,” tiin Ningania Facebook-a a post-ah a tar lang tih AFP news agency chuan an tar lang.
An thenawmte in chungte pakai an tum laiin ‘tui tam lutuk maiin a chim a, an zavaiin a la vek lo chauh’ tih Collins-i chuan a tar lang bawk.
Tui hian an fanu, Ivy chu a la ta a ni.
Hmun dangah rugby league star Issac Luke chuan a pa, George chu kar tir lama North Island-a lei minah a chân ve bawk.
Hmeichhe pakhat, Rachel Greene-i chuan a nu, Marie chu a chenna cottage chungah a chenna neitu fapain cyclone a thawh hnuah thiin a chhar tih a sawi.
Rachel-i hian ni li chhung zet a nu chin hriat tum hian a bei a, vawi tam Marie-i hi voicemail a thawn a ni.
New Zealand climate minister chuan khuarel chhiatna rapthlak an tawrh hi sik leh sa inthlak nasa nghawng pakhat a nih thu a sawi.