United States chu thlasik thlipui na takin nuai mekin hei hian hmun tam takah khaw vawt vin tak thlengin nunphung pawh a khaihlak phah nasa hle.
Texas-ah chuan mipui electric mamawh a san em avangin an indaih lo va, an inênchhawk a ngai a. An ram sanaa Thawhlehni zan (India-a nimin chawhma) lamah vur a tla leh chiam dawn nia sawi lawk a la ni.
National Weather Service (NWS) chuan American maktaduai 150 chuang zet thlasik khaw vawt vin tak hian a tuam thei dawn niin an sawi.
Khuarel chhiatna kaihhnawihah mi 11 laiin nunna an chân tawh bawk.
Thihna thlenna hmunte hi Tennessee, Texas, Kentucky leh Louisiana a ni.
North Carolina-ah chuan thlasik thlipuiin a ken tel tornado chu Thawhlehni tuk (India-a zan) khan a thawk a, mi pathum thiin mi 10-in hliam an tuar bawk niin an sawi a. Chhanchhuah hna thawh mek zel a ni.
Thlisik thlipui hian Mexico hmar lam pawh thleng tawhin chhungkaw maktaduai li zetin power supply an neih loh phah.
“American maktaduai 150 chuang zet chu thlasik thlipuiin a tuam theihin an awm mek a, vur a tla thei a, vur thli pawh a thawk thei a. Khaw awm dan hi vaukam lehlam atanga lehlam thleng tuam tur a ni,” tiin NWS chuan an thuchhuahah an tar lang.
Thawhlehniah khan NWS hian US ram puma 73% chuang chu vurin an khuh niin an sawi.
Chhim lama phaizawl an tih – Texas, Oklahoma leh Kansas state awmnaah chuan vur inches 30 vel a tla dawn niin NWS meteorologist Marc Chenard chuan a sawi.
“Dan pangngaiah chuan hetianga chhim lam boruak vawt hi kan hre ngai lo,” a ti.
Louisiana-ah chuan tual chhung thuneitu thenkhat chuan mi pawn chhuak tur dan nan curfew an puang a. He state-ah hian power awm lo leh lirthei kal vel buai a tam hle.
Oregon-ah pawh vur a tla nasain vur thli a tleh nasa a, Thawhlehniah khan mi 2,50,000 dawn leh sumdawnna hmun tam takah power a awm lo.