Aizawl: MNF Media & Publicity department chuan nimin khan thuchhuah siamin February 13, 2023 khan GAD (Aviation)-in Lengpui Airport-a khualzinte bungraw nawrna trolley hnathawh nana hmangtute hrem an nih tur thu leh February 14, 2023 khan office order thar a tichhuak niin an tar lang.
Khualzinte trolley chungchanga politics inbeihna a chhuak hi pawi an tih thu sawiin MNF Media & Publicity Department chuan, a theih anga zirchiangin thil awm dan sawifiah tulin an hriat thu leh, trolley tihbawlhhlawh avanga Lengpui airport chei that hnathawh kal lai titawp (stay) zawnga Congress party an che chu demawm an tih thu an sawi.
An thuchhuaha a lan danin October 20, 2022 khan Principal Consultant, GAD (Aviation) hoin Lengpui Airport-a passenger trolley indaih lohna sawiin an thukhawm a, sorkarah trolley 100 lei belh dil a ni.
November 10, 2022 khan finance dept. chuan rem tiin hun a duh rei loh zawk nan restricted tender hmangin February 17, 2023 thleng hawngin quotation chhuah a ni a, supplier thlan fel a ni.
Supply order issue atanga a rei lo berah ni 30 velah trolley chu hmuh beisei a ni a. Tin, hemi hma hian baggage trolley repair-na tur spare part pawh Delhi-ah chah a ni a. A lo thlen ni – Feb 13 leh 14 khan repair zawh fel nghal a ni bawk. Tun dinhmunah baggage trolley hman theih zat chu 74 a awm mek niin an tar lang.
February 13, 2023 khan GAD (Aviation)-in office order tichhuakin hnathawh nana baggage trolley hman a khap nghal a, an tihchhiat man hu chawi turin a hriattir nghal. February 14, 2023 khan trolley hman dan tur order khauh tak a tichhuak niin an tar lang bawk.