Union Minister of State for Communication Devusinh Chauhan-a’n nimin khan Serchhip a tlawh a, India Post hnuaia hamthatna awmte ngaihvena chhawr tangkai turin Mizoram mipui a sawm.
Serchhip Bawrhsap Conference Hall-a district hotute nena an inkawmnaah union minister chuan postal service tihchak leh zual kawngah tanlak an tum thu leh internet connectivity tihmasawn leh zual tura hmalak a nih thu a sawi a. India Post hnuaiah hamthatna hrang hrang mi retheite hnen thleng thei a awm thu sawiin, hengte hi ngaihvena chhawr tangkai turin mipuite a sawm a ni.
Chauhan chuan Serchhip district-a sorkar laipuiin hmasawnna hna a kalpui mekte a mit ngeia a hmuh thu leh heng hnathawhte hi tha taka tihhlawhtlin a nih chu an duhthusam a nih thu a sawi a. An duhkhawp lohna laite leh tan lak ngaihna laite a awm a nih chuan a hnena thlen turin official kalkhawmte chu a chah.
Union minister chuan Prime Minister Narendra Modi-a’n India hmarchhak hmasawnna chu a ngai pawimawhin a vei nia sawiin, a minister-te chu India hmarchhak state tlawh vek tura a tih thu leh a ni pawhin phur taka a bawhzui thu a sawi.
District official-te nen an inkawm hnu hian union minister hian Serchhip Bawrhsap Conference Room-ah Serchhip District MJA, Sub-hqrs YMA, Joint Village Council leh kohhran hruaitute a hrang theuhin a kawm leh a, hemi hnu hian Serchhip District Hospital leh Post Office-a tlawh bawk.