Aizawl : ZPM Working President K Sapdanga chuan nimina an party pisa-a political session-ah thu sawiin, Assembly budget session neih meka sports chungchang resolution pawm tak chu sports minister tihmualpho tumna nia a lan thu a sawi.
K Sapdanga chuan, “Tun laia lar tak chu sports department a ni; session-ah a fakna resolution put luh a ni. MNF sorkar fak tumna leh minister fak tumna ni angin lang mah se, an sawi enga lo lang chu sports minister tihmualpho tumna niin a lang,” a ti.
Sports chungchang resolution sawihona ngaihthlak atangin ruling party te’n thiam takin he resolution hi an pu lut nia a hriat thu a sawi a. “He department hian sum an han hmang hnem khawp a, minister hian a remhriatna bakah zawl pachal tak a neiin niin a rinawm. Chu’ng an sum hmanna te chu Utilisation Certificate theh luh tur an nei lawi si lo a; chuvangin, project thar an theh luh pawh sorkar laipuiin an hnathawh hmasate chingfel phawt tura tiin a lo dang tlat a ni,” tia sawiin, hei hi mipuiin an hriat loh thu leh mipui hriata sawi chhuahna remchang a awm theih beiseiin, ruling party te’n resolution an pulut ta a, opposition te nen sports minister mawng an hlim ho ta niin a sawi.
Sorkar laipui ruahman scheme atang ringawt hian sports hian Rs nuai 40,000 chuang an chang tih sawiin K Sapdanga hian, hetiang khawpa sum a tam chung si hian sports association hrang hrang te’n sum an dawn thin kha a hmu mumal ta lo a. Heti khawpa sports atana sum a len vel lai hian mipui mamawh atan sum a awm lo a, a huna hlawh pek tur an nei thei hek lo; a chang phei chuan hnathawkte hlawh a puk nia sawiin, “Central atanga sum lo kal te hi sport department-ah a khawhlut pur pur a, heng zawng zawng hi kan belhkhawm chuan cheng vbc 600 chuang sports atan an hmang a ni,” a ti.
Tun tum ministry hi mipuite’n hun pek an tum tawh lo a, a chhan tam tak zinga lian ber chu sum an atchilh lutuk hi a ni tiin K Sapdanga hian, “Sum hi an hlepru mai ni lo in an thuktu a ni ber a, an cheziaah mipui lung a awi thei lo,” a ti bawk.