Aizawl : Nimina an party pisa-a Friday Political Session-ah BJP Mizoram President Vanlalhmuaka’n district pahnih – Mamit leh Lunglei-a BJP President a ruat tharte a puang.
Vanlalhmuaka hian BJP Lunglei District President thar atan P.C Lalduhhlanga, Pukpui Lunglei leh Mamit District BJP President atan Ngursailova Sailo, Mamit Bazar Veng chu a ruat thar a. BJP inkaihhruaina angin district pahnih a President te hian an thawhpui tur OB an ruat leh dawn a ni.
Thihna avang leh rawngbawlna avanga district pahniha BJP President hmun ruak hnawh khah a ni ta chu lawmawm a tih thu Vanlalhmuaka hian a sawi a. Lunglei leh Mamit district-ah nasa leh zual a BJP ten hmasawnna an neih ngei a beisei thu a sawi.
Mizoram hmabak hi ngaihtuah ngamawm loh khawpa ngaihtuahawm a nih thu leh kawng engkimah Mizoram sorkar hi a tla chhe mek nia sawiin Vanlalhmuaka hian, “He’ng harsatna ril tak hi Mizoram mipui te a tuar tu kan nih avangin siam that a, tihdam a ngai a. BJP chauh hi harsatna chingfel thei awmchhun a ni a. BJP Sorkar hi kan damna tur a ni tih hre turin ka ngen a ni,” a ti.