UEFA Europa Conference League Playoff round khelh a ni a. Italian club pahnih Fiorentina leh Lazio ten hnehna an chang ve ve.
Fiorentina chu Ningani zana team langsar ber niin 4-0 in Sporting Braga an hneh.
Estádio Municipal de Braga a inkhelah La Viola chuan striker Luka Jovic chuan goal hnih a khung a. Substitute bench atanga dah luh Arthur Cabral chuan goal hnih a khung ve bawk.
Vincenzo Italiano pawlte hian he inelna hi an la thutak tih an lantir a. First leg a an chetthat avangin Stadio Artemio Franchi-ah an tan hmabak a ko tawh lo.
Striker Jovic hian goal hnih a khung avangin Europa Conference League-ah goal ruk a khung tawh a, top scorer a ni mek.
Braga an khelchhe lova, nimahsela second half tan tir lamah Vitor Tormena red card hmuh an tuar a, kim lo an nih hnuah goal thum an chhuah.
Lazio chak hram
League lamah an che chhe lova, mahse Europe huap inelnaah erawh Lazio an chesual teuh. Romanian club CFR Cluj-Napoca nen inkhelin 1-0 in an chak.
Stadio Olimpico-ah Lazio in minute 15-naah an player Patric chu red card avangin an chan a. Referee thutlukna in sawisel a hlawh viau.
Biancocelesti hi Europa League atanga tla thla an ni a, Europe lama an chet fuh theih loh a kal zel dawn niin a lang hman. Nimahsela kim lo chung pawhin an khingpuite an khel tawk viau a. Halftime dawnah striker Ciro Immobile chuan inkhel a goal awmchhun a khung.
English referee Craig Pawson erawhin inkhel zawh thlengin sawi zui a hlawh. Lazio head coach Maurizio Sarri chuan, “Thildang ka sawi teuh duh lo, mahse ka sawi duh awmchhun chu Europe huap inelna inkhel a enkawl thei hi a mak ka ti.” tiin a sawi.