NBA in All-Star weekend an hmang a. Pathianni zing khan Slam Dunk Contest-ah kum 24 mi, league a inkhel lo Mac McClung a champion.
McClung hi kum 2021 NBA Draft khan player thlan loh zingah a tel a. NBA team ten contract tenau ziahpui in an team-ah chher thin mahse league-ah a la inkhel lova. G-League-ah a inkhel thin.
Thawhlehni khan Philadelphia 76ers hnena contract ziak hlim a ni a, an G-League team tan a khel mek.
Youtube leh social media-ah a dunk thiamzia a larpui thung a, hei vang hian tun Slam Dunk Contest-ah a tel.
G-League player zinga Slam Dunk Contest a tel thei hmasa ber a ni a, a tel tur hian sawi a hlawh viau. Nimahsela dunk ropui tak pathum a neih hnuah NBA player ropui Shaquille O’Neal leh Magic Johnson te chuan Slam Dunk Contest hlutna tinung thartu tiin an sawi.
All-Star Weekend zan hmasa zawka inelna hrang hrangah 2023 Starry 3-Point Contest-ah Damian Lillard chuan pakhatna a hauh a. Kum 2020 a champion Buddy Hield a hneh.
Lillard hian round hmasa zawkah point 26 a score a, pahihna hauhin final round-ah point thum kengtu ‘starry bucket’ vawi hnih a lut a. 26-25 in Hield hi a hneh.
Tukin zing khan NBA All-Star game khelh a ni dawn a. Team LeBron leh Team Giannis ten player thlang chawpin All-Star game an khel ang.