Bihar Chief Minister Nitish Kumar chuan 2024 Lok Sabha inthlanpui lo awm tur atan BJP do turin Congress chu eptu party-te thawhhona tur siam thuai thuai turin a ti.
Janata Dal (United) hruaitu hlun hian Congress chu chawl hman an nih loh thu leh Rahul Gandhi-a’n ‘Bharat Jodo Yatra’ a neih phur lai chu chuh thuai turin a ti.
“Congress hian thutlukna a siam thuai a ngai. Ka thurawn hi laa tangruala beih a nih chuan BJP hian bial 100 pawh an la tling lo vang a; ka thusawi an ngai pawimawh lo a nih erawh chuan engnge lo thleng chu in hmu mai ang,” a ti.
Kumar hian Communist Party of India (Marxist–Leninist) Liberation (CPI-ML) general convention vawi 11-naah he thu hi a sawi a. Anni party hi pawn lam atanga Kumar-a kaihhruai Mahagathbandhan sorkar thlawptu an ni a. Union minister hlui leh Congress hruaitu hlun Salman Khurshid, deputy chief minister leh Rashtriya Janata Dal (RJD) hruaitu Tejashwi Prasad Yadav leh CPI(ML) General Secretary Dipankar Bhattacharya te pawh convention-ah hian an tel.
“Congress-a ka thiante hnenah hian Bharat Jodo Yatra kha a tha em em tih hrilh ka duh a; mahse, an tawp mai tur a ni lo,” tiin Khurshid-a lam hawiin a sawi a. “Congress atangin party dangte dawr kualna ka ngaichang mek a. Congress hian an thawhpui tur an tihchian thuai a ngai,” a ti.
Kumar-a hian BJP kaihhruai sorkar beihna remchangah a hmang bawk a. “Mipui tan engmah tih an nei lo va. Mahni an infak mai mai a ni,” a ti a. “Eptute hian ram hi hmasawnpui kan duh a, chumi atan chuan tanho chu a bulpui a ni,” a ti bawk.
RJD hruaitu Yadav-a pawhin chief minister thlirna hi a thlir ve dan tho a ni a, eptute chu tangruala BJP leh a thawhpuite do let dan tur ruahmanna siam a ngai tih a sawi a. “Congress hian an tih tur tichiang sela, eptute zawng zawng hian ram tana thawh hi an châk zek zek,” tiin grand old party chu rim taka thawka BJP bei turin a ti.
Congress hruaitu, Kurshid chuan a thil hriatte chu an party thuneitu sangah a thlen tur thu a sawi a. Kumar-a thu sawi chhangin, “Point tam tak, thenkhat chu inhawng taka sawi i nei a. Keiin ka pawm ang chiahin Congress pawhin an pawm ka ring,” a ti.
Khurshid-a hian Kumar-a kaihhruai ‘Bihar model’ chu BJP ‘huatna tihlanna’ atan hman atan a tha tih a sawi bawk.
Dipankar Bhattacharya chuan eptu party-te lian taka an tanho chu ‘ram danpui leh mipui rorelna beihna chhan him nan’ a tul tak zet tih a sawi.