Congress Legislature Party (CLP) Leader Zodintluanga Ralte chuan Lengpui Airport-a trolley chungchang assembly house-a sawiho hlauah MNF MLA-te a puh.
Zodintluanga Ralte hian assembly session neih mekah private member resolution, ‘Ram dang zin mite leh ram chhung zin mite tana harsatna siama bungraw nawrna trolley tam tak hmanga tichhetu hi hrem ngei ni se, trolley an tihchhiat zawng zawngte hi thla khat chhungin a tharin thlak vek rawh se’ tih pulutin, February 17, 2023 khan assembly house-a sawiho tura chhuak zingah pakhatna a ni a; mahse, sawiho hman a ni lo.
A resolution sawihoa hman a nih loh chungchangah CLP leader chuan thuchhuah siamin, MNF MLA-te chu a resolution sawiho an hlauh avanga amendment bill sawi kual lui vak vakah a puh.
Zodintluanga chuan Lengpui Airport chu December, 1995-ah Congress sorkar laia sak a nih thu tar langin, “Kum hnih leh thla hnih chhungin Congress sorkar lai vek, February 1998 khan sak zawh a ni. Enchhin ngai a tam avangin Congress sorkar laia hawn hman a ni ta lo a, MNF sorkar thar a lo pian hnu lawk, December 2, 1998-ah hawn a ni ta a ni,” a ti.
CLP leader hian March 10, 2022 tlai khan Lengpui Airport-a baggage make-up area siam that mek chu a lo chim tawh a, contractor chu Zoramthanga fachuam, Kamrul-a (KR Construction) nia tar langin, “Hetiang taka hna tha lo avanga a chim lai hian MNF sorkar chuan a chim chhan a zirchiang duh miah lo,” a ti a, MPYCC leh Mizoram First-ten Lokayukta-ah FIR an theh luh thu a sawi.
Lokayukta chuan CBI ko lut turin thutlukna a siam tawh tih sawiin Zodintluanga chuan, “Mahse, kum hnih a liam hnuah pawh CBI koh luh an la ni lo. MNF sorkar hian Aviation Wing leh Lengpui Airport an enkawl dan chhui chian hi an hlau hle niin a lang,” a ti.
CLP leader tar lan danin Lengpui Airport chhung leh a pawn lam chei that hna hi M/s Zoramchhana (CM Zoramthanga tupa) leh M/s KR Construction (Kamrula Chhangte) te hnenah dan loa restricted tender hmanga pek a ni a. M/S Zoramchhana hian Rs. vbc. 75.76 man a thawk a, KR Construction hian Rs. vbc. 40.92 man a thawk thung.
“Lengpui Airport siam that hna thawktute hian khualzinte bungraw nawr kualna ber, trolley-te chu cement, rod leh bungraw hrang hrang thiar nan an hmang mai mai a, official lam atangin an khap ngam lo. Official-te hian Kamrula an ngam lo a ni lo; a phena awm ram hruaitu lal tak hi an hlau zawk niin a lang,” a ti.
Hetianga bungraw thiar nana Lengpui Airport-a trolley-te an hman avang hian a chhe nasa hle tih tar langin Zodintluanga Ralte chuan, “Congress sorkar laia trolley 300 atanga 400 inkar awm thin kha 20 vel bak hmantlak a awm ta lo a ni. Hetiang a nih avang hian khualzinten harsatna an tawk nasa hle a, phai lam chanchinbu thlengin tar lan a ni,” a ti a, Mizoram tan a mualphothlak thu a tar lang.
Zodintluanga Ralte chuan Mizoram airport neih chhun, Lengpui Airport hi MNF sorkarin a sawp chhe mai ang tih hi Congress party chuan an hlau tih sawiin, “Induhsakna hleihluak tak avanga Tuirial Hydel Project an tihthuanawp dan te, Falkawn Referral Hospital an sawp chhiat duh dante ngaihtuahin Lengpui Airport hi an sawp chhe leh mai ang tih kan hlau a ni,” a ti.