Aizawl : Mizoram Legislative assembly budget session neih mekah Zirtawpni khan ZPM legislature party secretary Dr. Vanlalthlana private bill putluh, ‘The Mizoram land revenue (amendment) bill, 2023’ chu sawiho a nih hnuah Assembly select committee-in a tul anga a bawhzui tura dah a ni.
ZPM chuan nikum budget session-ah Dr. Vanlalthlana hian Mizoram assembly din hnua private member bill pathumna ni turin ‘The Mizoram private transport workers (welfare) bill 2022’ a lo pulut tawh tih sawiin, eptu member ni chunga a kum zawna private bill pulut thei khawp Dr. Vanlalthlana taimakna fakawm an tih thu an sawi a. ZPM chuan an chhuang hle tih an sawi.
Eptu member bill a nih avanga rorellai ten an pass pui duh lo anga lang chu pawi an tih thu ZPM chuan an sawi a. “Ram hmasawnna tur bill pawimawh tak tak pahnih a kum zawna pass loh a ni hian ram tana legislator thahnemngaite inpekna a ti pamhmai hle a ni” an ti.
ZPM chuan “Heng bill te pass a nih loh nana dangtu rorel mek party te hian mipui hma an ngai tak tak lo niin a hriat bakah, kan sorkar hrawn meka rorellai ten eptute an enhranna nasa lutuk a tilang chiang hle ni ah kan ngai” an ti bawk.
“Tuna budget session neih mek hi kan ministry hrawn laia budget session hnuhnung ber tur a ni a, ZPM MLA te an inbuatsaih nasa a, mipui aiawhin zawhna an zawt hnem a, thahnem pawh an ngai” ZPM chuan an ti a. “ZPM hi eptu group lian ber a nih angin mahni bial chauh ngaihtuah thei lovin ram pum thu pawimawh tak tak an sawi chhuak a ni” an ti a. House zahawmna vawnnun kawngah te, roreltu awm dan mawi ngaihpawimawh thuah te ZPM MLA te chuan hma an hruai nasa hle niin an sawi bawk a ni.