- Zirsangkima
Music genre hrang hrang—pop, rock, jazz, country, hip-hop, adt. zínga inhlãwm khâwm tha bera ngaih leh inngeih bera ngaih chu Country musician-te hi an ni ngei ang. Hmãn atang tawh khán chhúngkua ang maiin an zai ho a, an inkàwm khâwm a, kár tàwpah The Grand Ole Opry-ah concert an nei ho ziah thin—vawiin thlengin.
Country music chanchin ringawt pawh hi ziah tùr tam tak a awm ang; hun dang atán khêk rih ila. Thupuia kan luh hma-in the Grand Ole Opry chanchin tlém han sawi ila.
November 28, 1925, khán radio personality leh announcer George D. Hay chuan country music concert show chu Grand Ole Opry-ah hian a buatsaih tan a, vawiin thleng hian an la chhunzawm reng a ni. Fiddler Uncle Jimmy Thompson chu the Grand Ole Opry-a inlan hmasa ber a ni. Country star zai te hi WSM Opry radio station, “Barn Dance” tia an sawi atanga pêk chhuah thin a ni. Show vawi khatah khatah hian zai thiam panga atanga pasarih te an zai thin.
1920s khan member 18 awmin tûnah hian member 70 an awm mék. Member zínga hming chhiatna nei chu an pêt chhuak fo. Chûng zíngah chuan a chanchin kan sawi tùr Hank Williams hi pêt chhuah hmasak ber a ni—a inlan hun tùra an tiha a inlan loh avàngin. Johnny Cash, Skeeter Davis, Jerry Lee Lewis leh Dierks Bentley te chu hnawh chhuah an lo ni tawh a. Johnny Cash leh Skeeter Davis te hi a hnuah lâk luh leh an ni.
Aw le, thupuiah lût ang le.
Hank Williams Sr.
‘Country artist-te hian tunge an ngaih sàn bera tu zai nge an entawn nasat ber?’ tiin zawhna siam ta ila, “Hank Williams” (tùn hnuah Hank Williams Sr. an ti deuh kher tawh) hming hi a ri ring khawp ang. A zai mai ni lo a hla phuah dàn thlenga entawn a ni.
1952 kumhlui thlah ni khán Hank Williams hian Charleston, West Virginia-a show a neihna tùr hmun chu a driver nèn an pan a. Kum 1953 kum thar a inher chhuah mék lai, zanlai pelh hretah Oak Hill, West Virginia-ah a driver chuan thil eia chàwlh a duh leh duh loh Hank chu a zâwt a; a duh loh thuin a chháng a. Ani (driver) thil ei zo chuan a pú, cadillac car vár seat hnunga thu, a pú chu thiin a hmu ta mai a ni. Kum 29 mi chauh nia a vàng lai hun hmang mék, country music khawvêla ‘lal’ anga léng mék Hank Williams chuan hlaa a lo chàwi ‘I’ll Never Get Out Of This World Alive’ tih ang ngeiin lungphu chàwlin he khawvêl hi a chhuahsan ta a ni.
A hla record zínga hla 55 (single vek) chu Billboard Country & Western Best Sellers-ah top 10-ah an lang thei a; hla 12 chuan No. 1 (a thih hnua hla pathum tiamin) an hauh pha thei bawk. “Hey Good Looking”, “I’m So Lonesome I Counld Cry”, “Lovesick Blues”, “I Saw The Light”, “Cold Cold Heart”, “Jambalaya (On the Bayou)” te leh a hla dang tam tak chu vawiin thlenga Country hla sak chhàwn (cover) hlawh ber bera an la ni reng a ni.
Hank Williams hian a nunah harsatna tam tak a tâwk a. A pian tirh atangin hnungzáng ná a nei nghâl a. A lo puitlin deuh hnua a daktawrte damdawi chawh chu ruih nána hmangin a ngawl a vei chho a. Nachhâwkna chak chi, morphine-a inchiu chíngin zú-ah nasa takin a tlãn bawk. Hmangaihna lamah a tluang reng bîk lo a; hêng harsatna a tawhte hi a hlaah pawh hmuh tùr tam tak a awm a ni.
Kum 1944, December 15 khán a nu, Lillie Williams leh a band (the Drifting Cowboys) member-puiten an duhpui loh êm êm, Audrey Sheppard chu nupuiah a nei a. May 26, 1949-ah an fapa leh an fa neih chhun Randall Hank Williams (Hank Williams Jr. tia hriat làr) chu an nei. Audrey nèn hian nupa hlim tak an ni ngai lo! Audrey hi a pasal làrna remchánga laa a phèna làr lo khêl ve rar rar chi a ni si a. An inneih hnuah Hank-a unofficial manager-ah amah leh amah a intantír a, band-ah bass a tum ve thin bawk. Hetih rual hian Hank-a hla tha tak tak leh hit ber berte hi Audrey sawipuina leh puihbawmna zára record thei a nihna chen a awm ve tho. Inhmuh thiam loh reng ai chuan tiin kum 1951, December 31-ah an inthen ta nge nge a ni.
June 1952-ah Hank Williams hian an khua Alabama-ah a nu a fin a. Hla hit tak tak a ti chhuak reng nachungin zu leh sa-ah a tãl na tial tial a. 1952 October 18-ah Bobbie Jett nèn court-ah an innei a. A thih atanga ni ngana-ah fanu, Jett Williams chu a piang a. Jett hi Hank-a nu-in dàn ang thlapin a là a, a hming pawh Catherine Yvonne Stone tiin a thlâksak a; 1980s tìr lamah chauh country legend Hank Williams-a fanu a ni tih a inhre ve chauh!
‘Thei rah tlâkna chu a kûng atangin a hla ngai lo,’ tia an lo sawi thin angin, Hank Williams Sr. hi kum naupang tê ni chungin khawvêl kalsan mah se, tu leh faten a hnung an zui rawn zui zêl a; a ropuina leh a talent thatzia chu a faten an rawn chhawm zêl a ni.
Hank Williams Jr.
Randall Hank Williams-a fapa neih chhun Hank Williams Jr. hi a pa thih hnuah a nu, Audrey Williams-in a enkawl sei lian a. A pa’n a koh thin dàn “Bocephus” tih chu a hming lemah vawiin thlengin a pu hlen bawk.
Rimawi lamah a inhmang hma hle. A hun hmasa lamah a pa zai dàn leh a pa hla a sa nasa thin. Kum 14 mi a nihin ABC TV Show, The Jimmy Dean Show-ah a inlan dèr tawh.
Ama style leh a thiamna a inhmu chhuak zêl a; a rimawi chuan southern rock, country, rock leh blues a háwl kual a ni ber. Musical instrument tum thiam a ngah hle—guitar, bass guitar, upright bass, steel guitar, banjo, dobro, piano, keyboards, saxophone, harmonica, fiddle leh drums a tum thei vek.
Bocephus hian CMA leh ACM Awards ngaih hlut ber “Entertainer of the Year” tum nga a dawng tawh a; records mtd 70 a hralh tawh a, chûng zínga paruk chuan platinum records hmu phain records 20-in gold an hmu pha bawk. A album 13 chuan #1 an thleng a, single records 10 #1 hauh pha a nei bawk.
Bocephus-a hian nupui pathum a nei tawh a; a nupui hnuhnung ber Mary Jane chuan nikum March 22 khán a borsalsan a; tûnah hian a pathlawi mék. Gwen Yeargain nèn fa pakhat, Shelton Hank Williams (Hank Williams III) an nei a; a nupui pahnihna, Becky White nèn fanu pahnih, Holly Williams leh Hilary Williams an nei thung. Kum 1990-ah a nupui pathumna Mary Jane nèn innei lehin fa pahnih—Katherine leh Samuel Williams an nei ve leh a. Katharine Diane Williams tih loh hi chu vawiina rimawi khawvêlah an inthlahrung lo vek a; rimawia inhmang lo ber Katharine Williams hi kum 2020 khán car accident-in a boral thung.
Jett Williams
A chunga kan sawi tâk anga Hank Williams-a thih atanga ni ngànaa piang, Jett Williams hian kum 32 mi a nihin Hank Williams-a fanu a ni tih a inhre ve chauh a. Hank-a ro thil vawn thatna hmun chu a unaupa Hank Jr. nèn an enkawl dùn thin. Ani pawh hi a pa Hank-a hnung zuiin Country music lamah a kal zui a. A pa backing band, The Drifting Cowboys te nen an tour ho thin. Studio album pali a ti chhuak tawh a. A pa ro vawn that kawnga tha thawhtu ber a ni zui.
Hank Williams III
Hank Williams a thlah chhuan thumna, Hank Jr. leh Gwen Yeargain te fapa Shelton Hank Williams hi December 12, 1972-ah piangin hming lemah Hank Williams the Third (Hank Williams III) tih rimawi khawvêlah a hmingthanpui mék a; “Tricephus” ti te pawha hriat a ni bawk. Tûnah hian studio album 11 a ti chhuak tawh.
Hank3-a music hi a inchawhpawlh nuai mawi a—sawi thiam pawh a har angreng hle. A tìr lamah chuan punk rock leh heavy metal lam a hrút na hle a. A hnuah country leh bluegrass lam a hrút tel leh a. Traditional country music, rockabilly leh punk rock inchawh pawlh tiin a sawi theih mai àwm e. A hla ziahte pawh hi a country fîr tia han sawi theih a ni chiah lo a; “cowpunk” an tih mai—country mainstream-a kalte huatna hla thu te leh ruihhlo (drugs) ruih lamte a tel nasa hle.
Hilary Williams
Hank Jr. leh Becky White te fanu pahnih zínga a upa zâwk, Hilary Williams hi February 26, 1979-ah a piang a. Ani pawh hi an chhúngkua-in Pathian thilpêk an dawn rimawi leh hla phuah lamah a kal ve a; mahse, “hlawhtling êm êm” tia sawi tùr erawh a ni lo.
A pa Hank Jr. chuan a fak hle a, ‘Lalnu zàiin a zái a, vàna arsi êng anga mawiin a zái thin,’ a ti. Album pali a ti chhuak tawh.
March 2006 khán a nau Holly Williams nèn a pí (a nu nu) vùinaa an kal tùr chu a car (SUV) khalh chu thunun zo loin an accident hlauh mai a; hmun 23 laiah zai tâwkin a dam khaw chhuak leh hlauh a ni.
Holly Williams
Hank Williams-a thlahte zínga a zai ka ngaihthlâk nin theih loh chu a tunu, March 12, 1981-a piang, Holly Williams hi a ni. A album hmasa ber “The Ones We Never Knew” chu 2004-ah a ti chhuak a, fak a hlawh hle.
Kum 17 mi a nihin a pa tingtang tumin hla a phuah tan a. A graduate hnuah rimawi lamah a kal zui. Billy Bob Thornton, Jewel, Train, Keith Urban te leh Kasey Chambers te chu a tour-pui thin te an ni.
Kum 2006-a a laizáwnnu Hilary nèn car-a an accident tum khán a bán ruh ding lam leh a ban rêk ruh a tliak a; tingtang a perh leh theih pawh a inring lo hman hial. He an chêt sual avàng hian a tour neih hmabâk pawh thulh a ngai nual a. Mahse, a rawn dam chhuak leh a. Heta a thil tawn hi, “Without Jesus Here with Me” tih hla (a hla zínga mawi ka tih ber)-ah a rawn puang chhuak a; an thil tawn chanchin hi lehkhabuah a ziak bawk a, “Sign of Life” tih a ni.
Hun rei tak a chawlh hnuin 2009-ah a album pahnihna “Here with Me” chu a tlángzarh leh zet chuan, The Tonight Show with Conan O’Brien, The Late Late Show with Craig Ferguson, Jimmy Kimmel Live! te leh Chelsea Lately show-ah te kawm a ni nghe nghe. People magazine chuan Holly album hi, “Top ten albums of the year”-an thlanah a lang pha a; Billboard magazine chuan, ‘Nashville atanga singer/songwriter album rawn chhuak zínga a tha ber zínga mi a ni,’ tiin an ziak bawk.
2010 khán a a pu, Hank Williams Sr. hla phuah zawh loh chu Sony/ATV Music Publishing chuan Bob Dylan-a kutah an dah a. Ani’n Holly hi phone-a biain an buaipui dùn ta a. Bob Dylan nèn hla pakhat ve ve an phuah zawhsak a; hla dang chu Alan Jackson, Norah Jones, Jack White, Lucinda Williams, Vince Gill, Rodney Crowell, Patty Loveless, Holly Levon Helm, Jakob Dylan, Sheryl Crow leh Merle Haggard ten phuah zoin, September 2011 khán “The Lost Notebooks of Hank Williams” tiin an tlángzarh ta a ni.
Sam Williams
Samuel Williams hi Hank Jr. leh Mary Jane Thomas te fapa a ni. Ani hi a pú, Hank Williams a ro thil tih vêl lama buai ve miah loa, nunphung pangngai taka, mãwl taka nun duh tlat a ni. Rimawi lamah pawh a inhmang lawk lo. Mahse, kum 19 mi a nihin a nun leh a rilru a inthlâk hlawk a; rimawi lam a luhchilh ve ta a, singles eng emaw zât a ti chhuak tawh.
A rimawi hian Country lam a páwl meuh lo a; a pi, a pa leh rimawia inhmang a unau dangte kal lohna lam pop lam rawng a kai zâwk mahin a hriat a. Kawng lehlamah chuan a kalna tùr tak a la inzawng kual ni pawhin a hriat theih bawk. Thil chiang erawh chu, Sam-a zai-ah hian, “Williams chhúngkaw talent” chu hmuh hmaih theih a ni lo!
IV
Hank Williams a thlah, chhuan lì-na, Coleman Finchum Williams, “IV” tia rimawi dawhsàna a hming lem inpe hi Hank Williams Jr.-a tupa, Hank Williams III-a fapa a ni. Ani thung hi chuan Williams hming inpe ve tawh loin “Coleman” tih ringawt emaw “IV” tih hming a inputtí ta; “Finchum” hi a nu hnam hming a lâk a ni thung. Ani pawh hi rimawi lama hmabâk êng tak nei a ni.
‘Four hian folk songs lam hla a phuah nasa a,’ tiin a producer, Jason Dietz chuan sawiin, ‘A hlawhtlin theih nán, a band member te hian mawhphurhna sáng tak an nei a ni,’ a ti.