French champion Paris Saint-Germain in Ligue 1-ah point riat a hma hruai turin huntawp dawnah Lionel Messi freekick mawi chu an chakpui a. Lille nen inkhel hmuhnawmah 4-3 in an ‘comeback’ hlawhtling.
Pathianni zanah Parc des Princes-ah PSG hi an mikhualte lakah hian 3-2 in inkhel tawp dawn lamah an hniam zawk hman a. Minute 87-naah Kylian Mbappe hmanga an si phurh an sut hnuah minute 95-naah Messi-a’n chakna goal mawi takin a khung.
PSG hi kuminah chetsual nei leh thin an ni a, league lamah phei chuan World Cup hma a fal angreng taka hma hruai hman kha an hnuaia clubte nen an inkar a zim leh hman viau.
An tana chanchin lawmawm lo ni tur awm bawkin kum 31 mi Neymar chu second half tan tir lamah hliam avangin zawn chhuah a ngai a. Inkhel zawhah a ke hi a chet lohna tura cher niin tiang a hawl a ngai.
PSG in Mbappe hmangin minute 11-naah goal an khung hmasa a, Neymar chuan minute 17-naah a khung belh. Lille tan Bafode Diakite chuan first half-ah goal khat khungin second half tir lamah Jonathan David penalty leh Jonathan Bamba goal khung hmangin an chhanglet a, chak thei dinhmunah an ding hman.
PSG hian Brazilian forward inhliam hi an endik nghal tih Thawhtanni khan an sawi a, ruh hliam awm lovin vawiin lamah tha hliam vel a awm em tih an endik leh ang.