Nimin khan state dinhmuna Mizoram hlan kai a nih champha, state day a ni a, sorkar buatsaihin Mizoram hmun hrang hrangah uar taka lawm a ni.
Aizawlah chuan State Day vawi 36 lawmna chu Vanapa Hall-ah neih a ni a, khuallian Chief Minister Zoramthanga’n Mizoramin kum 36 lai state nihna a chang ta chu lawmawm a tih thu leh he niah hian Mizoram chu mi dangte tan malsawmna ni tura inbuatsaih a tul thu a sawi.
Tuna Mizoram a lo indin chhoh dan sawiin chief minister chuan, “Rambuai harsatna tinreng paltlangin vawiinah remna leh muanna duhawm tak hnuaia hun kan hmang thei hi siamtu’n chhan neia a rel vek a ni a, mi dang tan malsawmna ni thei tura min buatsaihna a ni,” a ti a. “Malsawmna haichhuah chu tu dang kutah ni lovin keimahni kutah theuh a awm a ni,” a ti bawk.
Chief minister chuan Mizoramah a chhunga cheng mipuite a let eng emaw zata chawm zo ram hman tangkai theih zau tak te, sik leh sa nuam tak, ruahtui tha tak takte a awm thu sawiin, hmasawnna chu thawklehkhata thleng vek thei ni lo mah se, a rahbi thiam taka zawna kalpui a tul a, chu chu mi thiamte tan chona nise a tih thu a sawi a, state day lawmnaa kalkhawm sorkar hotute chu Mizoram tan theihtawp chhuah turin a sawm.
State Day lawmna inkhawm hi Chief Secretary Dr. Renu Sharma-i’n a kaihruai a, NGO Co-Coordination Committee Chairman R. Lalngheta’n thu a sawi bawk a, inkhawmah hian Deputy Chief Minister Tawnluia, Speaker Lalrinliana Sailo, minister, MLA leh sorkar hotu thahnem tak an tel.
Mizoram chu union territory dinhmun atangin February 20, 1987 khan state dinhmunah hlan kai a ni a, India rama state 23-na a ni a. Mizoram state puitlinga hlan kai a nih theihna tur hian August 5, 1986 khan parliament chuan Mizoram State Bill a pass a ni a. Kum 1987, nimin ang khan khatihlaia prime minister, Rajiv Gandhi-an Lammuala inkhawmah Mizoram state thar chu a hawng a ni.