Assembly session neih meka ZLP member, Dr Vanlalthlana ziaka zawhna a chhan danin finance changtu, Chief Minister Zoramthanga chuan OSD to Chief Minister Rosangzuala office enkawlna, allowance dawn leh a zin veivahna senso tun thlenga bill pek tawh chin chu Rs 21,59,197 a nih thu a tar lang.
Chief minister-in ziaka zawhna a chhan danin OSD to CM Rosangzuala office enkawlna atan Rs 21,59,197 bill pek tawh a ni a, hei bakah hian MR bill leh vehicle outsourcing bill tlem pek leh tur a la awm a. Bill hi pawmpui a la nih loh avangin a zat chiah a la hriat theih rih loh a ni.
OSD to CM hian kum 2021 chhung khan TA/DA a bill zat chu Rs 64,193 a ni a, kum 2022 khan Rs 4,02,050 bill-in, kuminah erawh TA/DA bill pek zat a awm lo.
Kum 2022 khan MR bill zat chu Rs 1,44,459 niin kumin 2021 leh 2023-ah erawh bill a awm lo thung.
Kum 2022 atang khan office-ah hian thawktu pahnih (co-terminus staff) rawih an ni a, kum 2022 khan PA hlawh atan Rs 6,39,199 sen niin kum 2023-ah Rs 57,911 sen a ni a. LDC hlawh atan kum 2022-ah Rs 4,27,654 leh kum 2023-ah Rs 38,731 sen a ni bawk.
Kum 2021 (Oct-Dec) chhung zin veivahna atan Rs 1,05,000 sengin kum 2022 (Jan-Aug) chhungin Rs 2,80,000 sen a ni.
September 14, 2021 khan Department of Personnel & Administarive Reforms (DP&AR)-in hriattirna a tihchhuahah OSD to CM atan Rosangzuala s/o F Lalsanga (L), Luangmual, Aizawl chu ruat a ni a. OSD to CM hi Mizoram sorkara secretary tlukpui niin a awmna hmunpui chu Aizawl a ni a. Engtik hunah pawh chawlhtir theih a ni a, a lawmman/hlawh (honorarium) atan sorkar atangin thla khatah Re. 1 dawng tura tih a ni.
September 14, 2021 khan Rosangzuala hian OSD hna hi chelh tanin, January 25, 2023 khan a nihna leh MNF headquarter-a Adviser to CM a nihna atangin Chief Minister Zoramthanga hnenah bânna a theh lut a. Bânna a theh luhah hian ram leh party tana tha zawk tura a ngaih avang leh chhungkaw tana hun hman a mamawh avanga bân dil a nih thu a lehkha theh luhah a ziak.